India Japan Intellectual Conclave-ah LESDE Minister

Nimin khan Shillong-ah India Japan Intellectual Conclave neih a ni a, Mizoram aṭangin Labour Employment, Skill Development & Entre­prenuership (LESDE) minister Lalnghinglova Hmar a tel.

Lalnghinglova Hmar chuan mithiamte thu­sawina zawng zawngah India, Japan leh Bangla­desh insumdawn tawnna a len tur thu leh, chumi kawngah chuan India hmarchhak state-te an pawimawh thu sawi lan a nih thu sawiin, "Mizoram pawimawhna pawh sawi a ni. He insumdawn tawnna lian takah hian Mizoram hian tel ve a duh mai ni loin hmun pawimawh tak chan a duh. Hetihlai hian kan tlin tawk a la sang lo a ni mai thei a, nimahsela sorkar thar lo piang hian hemi kawnga hmalakna awmte chhunzawm a, a hma aia chak zawka kalpui a tum a ni, " a ti.

Mizo ṭhalaite Japan-a hnathawk tura an kal chhuah mêk thu sawiin LESDE Minister chuan, "Mizoram sorkarin hei hi lian tham zawka kalpui a tum mek," a ti a, hemi kawnga thawhpui turin sorkar laipui aiawh te, state sorkar aiawhte leh company hrang hrang hotute a sawm nghal.

Conclave thupui chu, 'North East India, Bangladesh and the Bay of Bengal in the Indo-Pacific: The Way Forward' tih a ni.

He hunah hian MP, minister hrang hrang bakah India, Japan leh Bangladesh aṭangin ambassador, high commissioner leh company-a mi pawi­mawhte an tel. India, Japan leh Bangladesh insum­dawn tawnna lam hawi sawi a ni a, Ministry of External Affairs, Embassy of Japan leh North Eastern Council buatsaih a ni.

Conclave-ah hian khawvel insumdawn tawnna kawnga India-in khawchhak lam hawi a tum dan te, Japan-in investment lian tham a kalpui dan te, India hmar-chhak state-te pawh he hmasawnnaah hian an tel thute sawilan a ni a, thawhho zel dan tur leh inpuihtawn dante zirho a ni bawk.