Union Minister-in job fair a hmanpui; Mi 18 appoinment letter hlan an ni

Assam Rifles chuan nimin khan 2 AR Gajraj Hall, Aizawlah rozgar mela/job fair an buatsaih a, Union Minister of Law and Justice Arjun Ram Meghwal-in a hmanpui a, Ministry of Communication hnuai Department of Post-a branch post master leh asst. branch post master hna hmu thar mi 18 te hnenah appointment letter a hlan.

Arjun Ram Meghwal chuan Prime Minister duh dan angin hnalak reng reng langtlang, dik leh awlsam thei ang bera kalpui a nih thu sawiin, "Ram ṭhang chak tak India rama hna hmu tharte chu ram tana innghahna an ni a, an laka beiseina sang tak neih a ni. Merit aṭanga teha tithate'n dik taka hna an hmuh theih nana hmalak chu sorkarin a ngaihpawimawh," a ti a, hna hmu tharte chu training ṭha tak neia rinawm taka hna thawk turin a chah.

Indiain chak taka hma a sawn zel thu sawiin Union Minister chuan, "Kum 2047 ah chuan ram changkang (developed country) ni thei tura ṭan lak a ni. Tun dinhmunah khawvela ram economy lian pangan kan ni mek a, economy lian ber pathumna pawh nih thuai kan tum. India chu sector hrang hrangah khawvela hmahruaitu a ni mek a, hei hian sum leh pai lakluh leh ram chhung sum leh pai dinhmun siam that kawngah awmzia thui tak a nei," a ti.

Rozgar mela hi sorkar laipui ruahmanna, hna nei lote tana hna siam sakna kawnga hmalakna pawimawh tak niin, hna zawngtu leh ruaitute'n awlsam zawka hma an lak ho theihna tura ruahman a ni. Hemi kaltlang hian hna hmu tharte hnenah appointment letter sem chhuah ṭhin a ni.