Union MoS-in sorkar hotute mipui tan theihtawp chhuah zel turin a chah

Union Minister of State for Law & Justice (Independent Charge) Arjun Ram Meghwal chuan nimin khan Kolasib a tlawh a; sorkar hotute chu centrally sponsored scheme hnuaia hmasawnna hna thawh hrang hrang sawipuiin, sorkar ruahmannate mipuiin a nih dan tur taka an chhawr theih nan theihtawp chhuah zel turin a chah.

Arjun Ram Meghwal chuan Prime Minister-in Union MoS-te chu India hmarchhak state-te tlawh vek tura a tih ang leh sorkar laipui hmalakna hrang hrang mipuiin a ṭangkai thei ang bera an chhawr theih nan an mamawh ngaithlaa kawng kawhhmuh tura lokal a nih thu a sawi a, "Mipuite'n sorkarin an tana ruahmanna ṭha tak tak a siamte an hriatchiana an chhawr ṭangkai ka duh. Department hrang hrang official-te pawhin mipui hamṭhatna tura sorkar ruahmannate a nih dan tur taka mipuiin an chhawr theih nan theihtawp chhuah zel ang che u," a ti.

DC conference hall-a ṭhut­khawmah hian district bawrhsap John LT Sanga'n Kolasib district dinhmun tlangpui leh sorkar hmalakna langsar zualte a tarlang a, Law & Judicial, RD, KVK, PHED, HFW leh School Education department hotute'n an department kaltlanga Kolasib district-a CSS hnuaia hmalaknate a lem nen entirin an sawifiah .

Union Minister hian DC conference hall-ah vek hian Kolasib Sub-Headquarters YMA, Sub-Headquarters MHIP, District Headquarters MUP leh Mizoram Gorkha Youth Association hruaitute bakah, sorkar department hrang hrang hnuaia CSS beneficiary-te leh Self Help Group-te kawmin, an hmalakna leh hlawhtlinna te, hmasawnna tur lrh an mamawhte a sawipui a ni. An mamawh an thlente chu a theih anga bawhzuisak a tum thu a sawi bawk a ni.