CM hlui inpekna leh hnathawh a lo lang chhuak zel - MNF

MNF chuan thuchhuah siamin Aizawl By Pass Road siamna tur sum Ministry of DONER chuan, PM- DevINE ṭangin Aizawl By Pass Road (Sairang - Muallungthu) siamna tur sum cheng vbc. 500 a rawn sanction fel ta tih tarlangin, "Lawmawm kan hle. He kawng siamna tura mutmawh hnarmawha neitu CM hlui Pu Zoramthanga inpekna leh hnathawh lo lang chhuak zel hi a lawmawm tak zet a ni," an ti.

Zoramthanga'n Aizawl khawpui helna tur kawng siam a ṭul thu sorkar laipuiah a thlen nasa hle tih tarlangin, "Sairang aṭanga khawchhak lam leh chhim lam panna tur kawnglian siam dan a ruahman a, chhim lam pan tur kawng hi Sihhmui - Sakawrtuichhun - Tanhril - Tlangnuam - Samtlang leh Lungleng inkarah kalin Muallungthu ramah Aizawl - Thenzawl kawng a pawh ang. He rawtna hi central lam hotute pawhin pawmpuiin Union Fibance Minister pawhin Pu Zoramthanga hnenah tihhlawhtlin a nih tur thu a lo sawi tawh," an ti a, mimal ram zangnadawmnaah harsatna a awm deuh avangin kum kal ta chhung khan sanction hmuh hman a ni ta lo niin an tarlang.

MNF tarlan danin, khaw­chhak lam panna tur kawng pawh Sairang - Rangvamual ral lehlam - Bawngkawn Brigade Field hmar lam aṭanga leiverh kaw hnih (twin tunnel) awmin, Zemabawk - Selesih kawng, Muthi thlen hma kawn hnuai chhuah lamah a lo chhuak ang. Chuta ṭang chuan Tuirial Airfield hmar lama lui kanin Phaibawk bulah kawngpui fin tur a ni. Hemi atan pawh hian leiverh hna hi tender chhuah fel a ni tawh.

Zoramthanga khan vei tak tea veiin, kawngpui ṭha leh ramro kan neih na turte, traffic tawt lutuk tihziaawmna atante tihtakzetin hma a la tih tarlangin MNF chuan, "Hmalakna lian tham a nih avangin vawi lehkhata peih zung zung theih a ni lo. Thil chhut chiang lo leh hrechiang lo mipui tam tak leh ramhruaitu ṭhenkhat phei chuan nuihzatahte an nei a nih kha. A hnathawh rah vawiinah a lo lang chho zel," a ti.