Minister hoin MTRIS Annual Governing Body meeting

Art & Culture minister C Lalsawivunga, The Mizoram Tribal Research Institute Society (MTRIS) Chairman ni bawk hoin nimin khan MTRIS Annual Governing Body an ṭhukhawm. Minister chuan Falkawna Art & Culture department hnuaia Zokhua chu uluk taka enkawl a, sum dehchhuahna rotling siam nana hmang turin a chah.

C Lalsawivunga chuan Mizo culture leh hnam ziarang vawnṭhatna lamah ngaihtuahna seng lehzual turin kalkhawmte a chah a, "Art & Culture department hi miin min hmuh dan kan thlak danglam a ngai a, dikna leh rinawmna nen theihtawpa hnathawh a pawimawh. Kan sum sèn ral ang angah pawisa deh chhuah dan kan ngaihtuah a ngai takzet a, Falkawn lama Art & Culture department hnuaia Zokhua kan neihte pawh uluk taka enkawl a, sum dehchhuahna rotling siam nan hman tum ang che u," a ti.

Ṭhutkhawmah hian Governing Board Member tur rawtna leh MTRIS By Laws/Constitution bakah MTRIS Rules and Regulation siamṭhatte sawiho a nih hnuah pawm a ni a; ṭhutkhawm zawhah Minister hian Falkawna Zokhua a tlawh nghal bawk.