MBJP President-in Lok Sabha inthlan hmang ṭangkai turin mipuite a sawm

Mizoram BJP chuan nimin khan an pisa-ah political session an hmang a, thusawitu MBJP president Vanlalhmuaka chuan Lok Sabha inthlan lo awm tur hmang ṭangkai turin Mizoram mipuite a sawm.

Vanlalhmuaka chuan Lok Sabha inthlan lo awm turah BJP-in hneh takin sorkarna a siam leh dawn tih sawiin, "Kan state retheihna ata khaichhuaha a awm theihna atan leh Mizo mipuite'n tlangnel taka central sorkar kan dawr ve theihna turin, central sorkar-ah Mizoram mipui aiawha kan MP-te thu sawiin awmzia a neih theihna atan inthlan lo awm tur hi hmang ṭangkai turin Mizoram mipuite ka sawm a ni," a ti.

Mizoram hian kan thlan fuh chuan centralah Mizopa ngei union minister kan nei thei tih sawiin MBJP President chuan, "Mizoram hian MP Lok Sabha leh Rajya Sabha ah fel tak tak, state-a rulling party aṭangin kan lo theh chhuak tawh ṭhin. Central-ah an thu sawiin awmzia a nei mawh hle," a ti a, BJP Lok Sabha MP thlang tura inbuatsaih turin Mizoram mipuite a sawm.

Vanlalhmuaka sawi danin, MLA General Election-2023 ah khan BJP chu Mizoram hian hnawl tawh mah se, Lok Sabha inthlan lo awm turah chuan Narendra Modi-a team a tel ngei tur BJP MP thlang tura inbuatsaih a ṭul takzet.