Traffic dan zawm ṭha leh duty ṭha lawmman hlan

Serchhip khawpuiah nimin khan Road Safety Month 2024 hman a ni a; Lawngtlai khawpuiah pawh February 11, Pathianni khan hman niin, traffic dan zawm ṭha leh Traffic Police duty ṭha thlanchhuahte hnenah lawmman hlan a ni.

Serchhip Bazarah nimin khan Serchhip SP MS Dawngkima hoin '33rd District Road Safety Month 2024' hman a ni a; Serchhip Traffic Police, MVI & Enforcement duty-te leh Serchhip Police ṭangkawpte'n Serchhip khawpui hmun hrang hrangah lirthei endik hna an kalpui nghal.

MS Dawngkima chuan kawngpui hmangtu chu mi chi hnih - lirthei khalhtute leh kea kal nana hmangtute an awm thu a sawi a, "Lirthei a pun zel avang leh kan tana awlsamna thlentu a nih ruala harsatna min thlentu a nih theih avangin kawngpui hmangtute lirthei laka vanduaina kan tawh palh theih laka fimkhur a ṭulzia inzirtirna atan ‘Road Safety Month’ hi hman a ṭul a ni," a ti.

He huna tarlan danin, Serchhip district-ah kum 2021 khan lirthei chetsualna thlengah nunna chan mi 7 leh kum 2022-ah mi 10 an awm a; kum 2023-ah erawh nuna chan an awm lo thung.

Lawngtlai Aerapagi-ah February 11, Pathianni khan lirthei khalh chungchanga dan inhrilhhriat tharna hun Road Safety Month pualin hun hman a ni a; Lawngtlai khawpuia traffic dan zawm ṭha leh Traffic Police duty ṭha thlanchhuah mi pali hnenah lawmman hlan a ni.

Lawngtlai district bawrhsap Cheemala Siva Gopal Reddy chuan dan ngaih pawimawhna leh fimkhurna chuan lirthei vanga chetsualna nasa takin a tih tlem phah thei tih a sawi a, "Lirthei khalhtute kut ah an mahni leh midangte nunna thui tak a innghat a ni," a ti.

He hunah hian Lawngtlai khawpuia autorickshaw, taxi leh maxi cab driver dan zawm ṭha thlanchhuahte leh dan kenkawhna kawnga thawk ṭha thlan chhuah Traffic Police-te hnenah Lawngtlai MJA president Elvis Lalthangzuala'n lawmman a hlan.

Lawmman dawngtute
Best Autorickshaw Driver - MC Lalchungnunga, Council Veng
Best Taxi Driver - T Lalnunzira, Council Veng
Best Maxi cab Driver - C Laldingpuia, Electric Veng
Best Traffic Police - Const. Joseph Lalramhlunzauva, Council Veng