KHAWTHLIR

MZP leh PHE Minister inkawm

Mizo Zirlai Pawl (MZP) hruaitute chuan nimin khan Public Health Engineering (PHE) minister Prof. Lalnilawma chu a pisaah an kawm. Prof. Lalnilawma chuan MZP chu sorkar thâ tichak tur leh Mizoram tihhmasawn kawngah sorkar thawhpuia, thawhhona ṭha tak chhawm­nun zel tum turin a sawm a; MZP hruaitute'n Parva III-a Zo hnahthlak raltlante'n tui thianghlim an dawn theihna tura an mamawh an thlen chungchangah a ṭul ang zela chinfel a nih theih nan a rang thei ang bera hma a lak tur thu a hrilh.

Dincham lawm

MSU chuan nimin khan HYVE Hall, Aizawlah an dincham vawi 23-na an lawm a, an hun hmanpuitu minister of state B Lalchhanzova chuan, "Kan state leh Mizo hnam himna ngaihthah chuang si loin 'think big, think international and think global' ang zawnga rilru leh ngaihtuahna sen thiam a pawimawh," a ti.

Office hawng

South Tuipui bialtu MLA Jeje Lalpekhlua'n a bial chhung mipuiten awlsam zawka amah an dawr theihna tura Hnathiala office a buatsaih chu nimin khan primary school a kal laia an headmaster H Lalpawla'n a hawng.

Armed Veng tlawh

FCSCA minister B Lalchhanzova chuan nimin khan a bial Aizawl East II chhunga Armed Vengah PWD hnuaia hnathawhte a enfiah a; PWD hotute leh khawtlang hruaitute chu leiminin kawng leh culvert a tihchhiatte fur hmaa siamṭhat dan tur sawipuiin, "Leimin siam thei tuikawng mumal lote'n harsatna a siam loh nan mipui lam pawh kan fimkhur a ṭul," a ti. Bialtu MLA hi bialtu corporator Christina Roluahpuii Sailo bakah, PWD leh Local Council aiawhte'n an ṭawiawm.

Ṭawngṭairual

Saitual leh Khawzawlah nimin khan kohhran leh tlawmngai pawl hrang hrang aiawhte'n nimin khan State Day of Prayer Committee bultuma February 20-a Mizoram State Day puala ṭawngṭairual neih dan tur an sawiho. Saitualah chuan chawhma dar 10-ah Saitual Public Playground-ah neih an rel a; Khawzawlah chuan chawhma dar 11-ah Mualvawm Ground-ah hman ni se, an ti.