Aizawlah No Tolerance Week

Aizawl Traffic Police leh Transport department enforcement staff-te'n February 12, Thawhṭanni aṭanga Aizawl khawpuia No Tolerance Week an kalpuinaah lirthei dan zawm kim lo 139+ an man tawh a; lirthei an man zingah number plate dik lo leh chhiah pe lo an tam.

Nimin khan Transport department enforcement staff-te'n lirthei dan bawhchhia 36 an man a, document hrensak 17 leh pawisa chawitir 19 an nei. An pawisa chawi tlingkhawm hi Rs 36,500 a ni. Traffic Police-te chuan lirthei 12 an man a, an pawisa chawi tlingkhawm chu Rs. 11,000 niin, document hrensak 8 an awm.

No Tolerance Week kalpui ṭan ni, February 12, 2024 khan Transport department enforcement staff-te'n lirthei 58 an man a, heng zinga 20 chu an lehkha pawimawhte hrensak an ni a, 38 chu a hmunah pawisa chawitir nghal niin, an pawisa chawi hi Rs. 72,000 a ni.

Aizawl Traffic Police-te pawhin lirthei 45 an man a, an pawisa chawi tlingkhawm chu Rs. 96,000 niin, document hrensak 26 an awm bawk.