Lirthei khû endiktir tum an tam
Mizoram Pollution Control Board (MPCB) hnuaia MINECO-a lirthei khû endiknaah ngaihhnathiamna tel loa lirthei endikna kalpui a nih hnuin a lêtin lirthei khû endiktir an pung a; nimin chawhmaa endik zat chu no tolerance week kalpui hmaa ni khata endik zat aiin a tam tawh zawk.
MINECO-a lirthei khû endik tirnaah hian no tolerance week kalpui a nih hma, kumin chhung vêkin ni khatah lirthei 150-200 vel an endik ṭhin. February 12, Thawhṭanni aṭanga Traffic Police leh Transport department staff-te'n Aizawl khawpuia ngaihhnathiamna awm loa lirthei endik hapta, no tolerance week an kalpui hnuah February 12 khan lirthei 226 an endik a; nimin khan Vanglaini palaiin a hmuna a zuk tlawhnaah chawhma thlengin lirthei 250 vel an lo endik hman tawh a, lirthei endiktir tuma intlar eng emaw zat an awm bawk.
Lirthei endiktute chuan no tolerance week kalpui loh laiin thui tak intlar buai ngai khawpa lirthei khû endik tur a awm ngai loh thu an sawi a; pollution certificate chu lirthei document zinga pakhat a nih avangin ngaipawimawh tur leh no tolerance kalpui a nih lai chauha ngaihven tum lo turin lirthei neitute an ngen.
Lirthei khû endik man hi two wheeler-ah Rs. 60, auto rickshaw-ah Rs. 80, LMV (petrol)-ah Rs. 120, LMV (diesel)-ah Rs. 150, HMV (diesel) leh MMV (diesel)-ah Rs. 200 ve ve a ni a; pollution clearance certificate hi a thih hmain a renew theih.
Lirthei khû endiknaah hian danin a phal chin pêlte chu ni sarih dam tur rejection slip pek ṭhin an ni a, chumi chhung chuan an siamṭhat bakah an test nawn tir ngei tur a ni. Ni sarih chhunga an siamṭha lo a nih chuan man theih an ni.