Nungcha 149 kaphlumtu mi pathum jail-ah dah

Environment, Forest and Climate Change (EFCC) department hnuaia Seling Forest Range leh Ṭawi Wildlife Sanctuary staff-te chuan silai hmanga sava 142 leh thehlei pasarih kaphlumtu mi pathum an man a; Wildlife Protection Act, 1972 an bawhchhiat vangin Central Jail-ah an dahlut.

EFCC tarlan danin, February 10, 2024 khan EFCC department hnuaia Seling Forest Range leh Ṭawi Wildlife Sanctuary staff-te chuan joint patrolling an nei a, Tlungvel khaw daiah dan loa sa peltu mi pathumte hi an sa kahte leh silaite nen an man a ni. February 12, Thawhṭanni khan heng mi pathumte hi magistrate hmaah hruai niin, Central Jail-ah dah luh nghal an ni.

Sa kah nana an hman - air rifle pahnih leh a mu bawm khat, ulhbun (SBBL) pakhat leh a mu 15 bakah hand pump (air pump) pakhat an mansak nghal a; an ramvahna hi Ṭawi Wildlife Sanctuary hnaih lam a nih avangin an nungcha kah hi sanctuary chhung ami a nih leh nih loh chhuichian mek a ni.

EFCC chuan, tunlai huna ramsa leh sava veh ching an la awm fo chu pawi a tih thu leh ngaimawhawm a tih thu a tarlang a, "Dan bawhchhe lo turin mi tin kan ngen nawn leh a ni. Dan ang chuan hetiang titute hi kum thum thleng lungin (jail) tantir emaw, Rs 25,000 thleng chawitir emaw, a pahniha hrem kawp theih a ni a, Wildlife Sanctuary chhunga thil thleng a nih phei chuan hremna hi a lêta tihnat theih a ni," a ti a; hetiang tih chingte zawn chhuah kawngah sorkar thlawp tlat tur leh a ṭul anga thawhpui zel turin mipui an sawm nghal.

Nungcha kaptu mi pathumte chu Lalchhuanawma (33) s/o Zaliantluanga, HS Tlangkhuma (68) s/o Salthanga leh Lalṭhazuala (41) s/o Lalzara, Tlungvel Venghlun, Aizawl district mi vek te an ni.