Commerce Minister-in bazar sak mek a enfiah; Bazar seat leh stall hralhte hriattir turin a ngen

Commerce & In­dus­tries minister F Roding­liana chuan nimin khan Aizawl New Market building thar sak meka hnathawh dan a enfiah a; bazar seat leh stall neitu zinga hralh chhawng hriate chu Commerce & Industrices hotute hnenah hriattir turin a ngen.

F Rodingliana chuan, bazarpuia seat leh stall changtute'n midang hnenah an hralh chhâwng ṭhin nia sawi a awm ṭhin chu a ngaih pawimawh thu a sawi a, "Commerce & Industries department thuneitute'n lo enfiah ula, thil dik lo ti an awm chuan allotment cancel sak thlengin hma la ang che u. Hetiang ti ṭhin hria chu department thuneitute hnena report turin ka ngen a ni," a ti.

Bazarpui building sak mek chu mipuite nghawng thil a nih avangin a ngaih pawimawh thu leh chak zawka hnathawh a ṭul thu sawiin Minister chuan, hnathawh mekte uluk taka vil tur leh quality control uluk turin a enkawltu department hotute a chah a; contractor-te pawh chak zawka hna thawk tur leh harsatna an neihahte a ṭul anga hmalakho zel a pawimawh thu a sawi.

Commerce Minister chuan, "Building sak mek hi a hmangtu tur mipuite tan veivah a awlsam zawk nan te, chhiatrupna leh rikrum thil a chêt a awlsam zawk nan leh building tin inkalpawh theih turin ruahmanna awm tawh sa chu tlema siam danglam a ṭha," a ti.

Commerce & Industries department hotute leh engineer-te nen siam danglam theih dan tur an enho nghal a, ruahmanna hmasa zawk aiin stall awm thei zat chu paih a ṭul thute sawi niin, mipuite him zawkna tur a nih avangin tih ngei ngei erawh a ṭul an ti.

Minister F Rodingliana hi Commerce & Industries director Florence Zotluangpuii, Smart City Project CEO CC Lalchuangkima, MAMCO chairman Isak Malsawma, contractor-te leh sorkar official dangte'n an ṭawiawm a ni.

New Market thar

■ New Market thar atan Smart City Mission hnuaiah ‘City Centre’ leh Commerce & Industries department hnuaiah 'City Centre Annexe' sak mek a ni.

■ City Centre project hi cheng nuai 4,035 man niin, Ground Floor leh basement bakah chhawng sariha sang tur a ni.

■ City Centre-ah hian dawr 1,105, four wheeler 31 leh two wheeler 79 dahna tur te, cold storage, CCTV, service lift leh office-te a awm dawn.

■ City Centre Annexe building sak mek hi cheng nuai 3641.59 man a ni a, dawr 135 leh hawkers 183 ṭhutna tur ruahman a ni.

■ City Centre Annexe-ah hian two wheeler 219 leh four wheeler 69 dahna bakah, staff quarters eng emaw zat sak tura ruahman a ni.