In sak ṭanpuina dawngtute March 31 hmain sak zawhtir vek turin sorkar laipuiin a beisei

Sorkar laipuiin chenna-in nei lo leh râp-ina chengte'n chenna-in ṭha an neih theihna tura ṭanpuina a ruahman, Pradhan Mantri Awaas Yojana Gramin (PMAY-G) hnuaia insak ṭanpuina dawngtute chu kumin March 31 ral hmaa sak zawhtir vek turin sorkar laipuiin state-te a beisei a; Mizoramah chuan insak ṭanpuina dawng 29,967 zinga 9,252 (30.87%)-in an sa zo tawh.

Rural Development department tarlan danin, Mizoramin insak ṭanpuina pek tur target a neih, in 29,967 hi registration tih vek tawh a ni a; insak ṭanpuina hi instalment 4-a pek niin, payment tin hi langtlang tak leh mi zawng zawngin an hmuh theih nan geotagging tih vek a ni. He scheme hnuaiah hian beneficiary tinte'n insak nan Rs 1,30,000 zel an dawng ṭhin a ni.

Sorkar laipuiin Mizoram chu insak tur target 29,967 a pe a, heng zinga 9,252 (30.87%) sak zawh tawh niin, sak lai mek 20,715 a awm. State Nodal Account-a fund dawn a nih veleh ṭanpuina pawisa hi sem mai theih turin Administrative Sanction ruahman lawk vek a ni. Insak kal lai leh la sak ṭan loh zawng zawng hi March 31, 2024 hmaa zo vek turin Ministry of Rural Development chuan state tinte a beisei.

Tun dinhmunah State Nodal Account-ah sum engmah a awm tawh loh avangin Ministry of Rural Development lamin sum an lo sanction leh State Nodal Account-a insak ṭanpuina pawisa a luh hnuah insak lai zawng zawng hi sak chhunzawm tura ruahman a ni. Insak lai zawng zawng leh PMAY-G target pumpui zawh nana sum la mamawh belh zat chu cheng nuai 16,215.875 vel a ni.