KHAWTHLIR

Ruihhlo do nan dollar 6,000 pe

Chin Babtist Council, Women dept, USA chuan ruihhlo dona-a Central YMA puih nan CYMA bank account-ah Rs 5,04,000 an rawn thun. CBC-USA te hian CYMA-in ruihhlo dona kawnga ṭangkaia an hman turin thla tin US dollar 1,000 chu Central YMA hnenah an hlan ṭhin a; tun ṭumah hian January-June, 2024 atan US dollar 6000 (Rs 5,04,000) an rawn pe leh a ni.

Khawl endik

Lok Sabha MP Inthlanpui, 2024-a Kolasib district-a hman tur Electronic Voting Machine (EVM) leh Voter Verifiable Paper Audit Trail (VVPAT)-te chu nimin khan IPR conference hall-ah endik thawhkhatna neih a ni a, khawl siamtu Electronics Corporation of India Limited engineer pathumte'n an endik. Endiknaah hian Election official-te leh political party hrang hrang aiawhte an tel a ni.

Dilna 130 pawm

Champhai District Child Protection Unit hnuaia Sponsorship and Foster Care Approval Committee chuan nimin khan an chairman James Lalrinchhana, bawrhsap hoin Mission Vatsalya (Child Protection Service) hnuaia kum 2022 leh 2023 chhunga naupang sponsorship leh foster fund dawng tura naupang 130 dilna an pawm.

Rs 2,12,160 hlan

Mizorama damdawi zuartute inzawmkhawm pawl, Mizoram Chemist and Druggist Association (MCDA) chuan nimin khan Central YMA hruaitute hnenah Manipur raltlante chhawmdawl nan Rs 2,12,160 an chhunglut a; MCDA president Lalhruailiana Sailo chuan CYMA president Lalhmachhuana hnenah a hlan a ni.

Heroin man

Excise & Narcotics department chuan nimin khan Aizawl Tennis Court bulah heroin kg. 3.642 (hawng 300) leh a neitua puh mi pathum - Nangzagina (50) s/o Sawngnanga, Ngur, Roluahpuia (53) s/o Thanzama (L), Ngur leh Faizur Rahman Barbhuiya (39) S/o Mujamil Ali Barbhuiya, Cachar, Assam nia inchhalte leh an lirthei TATA 207 (MZ04 A-1428) an man. Heroin vanga mante hi The Narcotic Drugs & Psychotropic Substances Act, 1985 tlawhchhanin thubuai siamsak an ni a, court-ah hruai nghal an ni.