Mizoram jail-ah tang thei zat bituk aiin Jail tang mek 594-in an tam zawk

Mizorama jail hrang hrang 10-a jail tang awm thei zat tura bituk chu mi 1,386 an nih laiin, nimin thleng khan jail tang 1,980 an awm. Jail-a tang thei zat tura bituk aia jail tang an tamna hi 594 a ni.

Jail tang tamna ber Central Jail, Aizawlah chuan tang thei zat tura bituk mi 438 a nih laiin, tun dinhmunah jail-a tang mek 924 an awm. Jail tang tlemna ber Lawngtlai District Jail-ah chuan tang 29 awm mekin, he jail-a tang thei zat tura bituk chu 98 an ni.

Mizoramah hian hmeichhe tan bika din jail pakhat - Central Women Jail, Aizawlah awmin, tang 180 an awm mek. He jail hi mi 96 tan theihna tura ruahman a nih laiin, tang 180 an mek a ni. Hetihlai hian, jail-a awm mek zinga 19 chu an nute an tan avanga jail-a awm ve naupang an ni.

Jail tang mek 1,980 zinga 1,709 chu mipa an ni a, mi 243 chu hmeichhia niin, 28 chu naupang an ni. Jail tang zinga 55 chu damchhunga tang tura an chungthu rel sak an ni tawh.

Tang zinga a tam zawk 1,085 chu an chungthu ngaihtuah lai mek (under trial prison) an ni a, mi 396 chu hrehawm taka tang tur a hrem (rigorous imprisonment) niin, mi 229 chu simple imprisonment an ni thung.

Jail ṭhenkhatah tang tur zat bituk aia tam tang an awm lai leh ṭhenkhatah tang tura bituk aia tlem tang an awm avangin Prison department chuan jail tang sawnkual hna an thawk mek. Jail tawt deuha mite chu a thawl deuhah sawn an ni.

February 13, 2024 pawh khan Champhai District Jail-a tang mek mi 11-te chu Serchhip District Jail-ah sawn an ni.

Jail tang dah tharte nen hian tun dinhmunah Serchhip District Jail-ah tang mi 73 an awm mek a, heng zinga 62-te hi mipa niin, midang 11-te hi hmeichhia an ni a; tang thei zata bituk chu mi 128 a ni.