Valentines Day-ah thisen pek runpui buatsaih

Association for Voluntary Blood Donation (AVBD), Mizoram State AIDS Control Society (MSACS), Blood Center - Civil Hospital, Aizawl leh Music Domain Mizoram (MDM) ṭangkawpte chuan nimin khan Dawrpui Multipurpose Hall-ah Valentines Day pualin thisen pek runpui 'Valentine’s Day Blood Donation Camp' an buatsaih a, Sports & Youth Service (SYS) minister Lalnghinglova Hmar-in a hmanpui.

Lalnghinglova Hmar chuan, midang tana rawngbawlna leh malsawmna a ni tih hriaa phût lêt nei miah loa thisen pe ngam tam tak Valentine’s Day Blood Donation Camp-a an tel thei chu ropui a tih thu sawiin, "Ram changkang apiangin thisen pek an uar. Khawvela thisen pek 40% chu khawvel ram hausa leh changkang an ni. A petute hi khawvela mihring awm zat aṭanga chhûta 16% chauh an ni phâk," a ti.

Thisen pêk chu changkanna leh hmasawnna intihhmuh tur chi tak a nih thu sawiin SYS Minister chuan, "Thisen pek runpui bulṭantu leh chhawm­nung zeltu bakah senso tumtute ṭha­hnem­ngaihna a fakawm. Thisen pek hi thil inchhirawm loh tak a ni," a ti a, pek theih loh hun awm thei a nih avangin thisen pe theite chu hun remchang an neih mek bawhpelh loa thisen pek chhunzawm zel tum turin a fuih.

Tetea Hmar chuan thisen pek ngai loa a pe theitu nih chu dinhmun duhawm leh ropui a nih thu sawiin, "Thisen pek hi thil hlauhawm a ni lo," a ti a, ṭhalaite chu an ṭhatlai hun chhunga a tam thei ang ber thisen pek hman tum turin a sawm.

SYS Minister chuan Mizorama thisen pe hnem ber C Lalremruata inpekna entawntlak a tih thu sawiin, "Mihring nunna chhan nana pawl din AVDB-te hmalakna chu a ropui takzet. Kum tina her chhuak ṭhin February 4 (Valentine's Day) hi tunge a ni tih pawh hriat lohte chunga hmangaihna lantir nana hman a ni ṭhin. Chìn dan mawi tak, midang tana malsawmna ni bawk hi chawinun zel a pawimawh," a ti.

Voluntary Blood Donation Camp puala inkhawm hi AVDB vice president Dr Zoram­dinthara'n kaihruaiin, general secretary Lalrin­kima'n report a pe.

HDFC Bank Ltd. hnenah voluntary blood donation camp 2024 buatsaih kawnga an hmalakna avangin chawi­mawina thuziak SYS Minister-in a hlan a, AVBD president C Lalnunnema'n lawmthu sawiin inkhawm tihtawp a ni.

Valentine's Day puala thisen pek runpui hi kum 2010 khan Chuauzikpuii'n a ṭhian ṭhate sawmin Civil Hospital Aizawl Blood Bank-ah buatsaihin bul a ṭan a, thupui atan 'Show Love, Give Blood' tih hman a ni.