Dan bawhchhia-a Youtube-a video upload-tu mi pahnih hrem an ni

Environment Forest & Climate Change (EFCC) dept. mi leh sate chuan tunhnai khan Wildlife (Protection) Act, 1972 section 9 bawhchhiaa thang chi hrang hrang hmanga sava leh nungcha dang tam tak tihlumtu leh, an chet dan video Youtube channel-a upload ṭhin mi pahnih an man.

EFCC dept. tarlan danin, Wildlife (Protection) Act, 1972 bawhchhia an mante hi Joseph Hmangaihzauva (27), South Vanlaiphai leh Lalmuansanga (32), Phunchawng te an ni. An pahnih hian pawisa chawitira hrem an nih bakah, an Youtube channel-a an thangkam dan leh nungcha chi hrang hrang an tihhlumna video delete tir an ni.

Joseph Hmangaihzauva hian a Youtube channel, 'Puiloa Zinkawng' tihah a ramsa thang kam a en lai leh nungcha chi hrang hrang a awk lai a ti lang ṭhin. Amah hi chhui mai a harsat avangin Cyber Crime Division, Aizawl te puihnain chhui chhuah a ni. An chhungkaw dinhmunte enin Rs 5,000 chawitir a ni.

Lalmuansanga hian a Youtube channel 'Sangtea Mifel em em' tihah a ramsa thang kam a en lai leh nungcha chi hrang hrang a awk lai a ti lang ṭhin. An chhungkaw dinhmunte enin Rs 4,000 chawitir a ni.

EFCC dept. chuan Youtuber mi ṭhenkhatte'n ramsa leh sava an pel lai leh thang chi hrang hrang hmanga sava leh nungcha dang an ti hlum lai video an upload-te chu chhui mek zel a nih thu tarlangin, "Hengte hi dan kalh an nih bakah, midangte hnenah nungcha laka hlei lenna kawnga a ṭha lo zawnga nghawng a neih theih avangin kan ngai thutakin theihtawp chhuahin tihbo tum mek a ni," a ti.

EFCC tarlan dnain, dan ang chuan hetiang ti tute hi kum 3 thleng jail tan tir emaw, Rs 25,000 thleng chawi tir emaw, a pahnih hmang pawha hrem kawp theih an ni.

Ramsa humhalh bik (schedule -I animal) an tihhlum phei chuan kum 3 aia tlem lo leh kum 7 aia tam lo jail tan tir leh, Rs 25,000 aia tlem lo chawi tira hrem tur an ni.