Kuhva chingtute an duty tawh lo

Hachhek Bial Kuhva Chingtu Pawl (HBKCP) bultuma hun eng emaw chen kuhva chingtute Hachhek bial chhunga an duty hnuah tunhnaiah duty an titawp.

Vanglaini palai zawhna chhangin HBKCP hruaitute chuan tunhnaiah duty an tihtawp thu an sawi a, "Mizoram sorkarin dan loa kuhva tawlhruk tur changin armed battalion darkar 24 chhung duty an dah bakah, dan loa kuhva tawlh thawm riva kan hriat tâk meuh loh avangin duty kan titawp ta rih a ni," an ti.

HBKCP hruaitute sawi danin, duty titawp tawh rih mah se, boruak an thlithlai reng a, a ṭul thuta che chhuak turin an inpeih reng a ni.

HBKCP hruaitute July 11, 2023-a ṭhukhawm chuan Zamuang Check Post-a duty-te thâ tichak tura duty an rêl a, a tuk aṭangin chhun zan zawm­in an duty ṭan nghal.

Hachhek bial khaw hrang hranga duty-te chu an in duty chhâwk ṭhin a, zing dar 9 aṭanga zan dar 9 thleng an duty ṭhin. HBKCP chuan duty-te thingpui inna tur an pai ṭhin.

A hnu deuhah chuan Zamuang Check Post bakah Tuidam aṭanga Tripura lam panna kawngah pawh duty an in dah. Kuhva chingtute hian an duty chhungin dan loa kuhva rah tawlh tum ṭum eng emaw zat an man.