MZP-in Mizorama Chakma hel pawl camp-te titawp tura hmala turin CYCA-te an hriattir

MZP hruaitute chuan nimin khan vice president C Lalremruata hoin Chawngteah Central Young Chakma Association (CYCA) hruaitute an kawm a, Mizoram chhunga Chakma hel pawl PCJSS te camp titawp tura hma la turin an hriattir.

MZP chuan Lunglei leh Mamit district chhung hmun riatah PCJSS camp a awm thu sawiin, hengte hi titawp tura hma la turin CYCA hruaitute hi an hriattir a ni.

Mizoram chhungah Chakma hel training camp awmte a rang thei ang bera an titawp lo a nih chuan hma an lak tur thu sawiin MZP hruaitute chuan, chumi hma-a hma la turin CYCA hruaitute hi an hrilh.

MZP hruaitute chuan Bang­ladesh aṭanga Chakma foreigner dan loa lo lut tam lutuk dan a ṭul thu pawh sawiin, "Chakma Mizoram chhunga awmsate tan pawh thil pawi tak a la nih dawn avangin Chakma illegal Immigrant-te chak taka in dan a ngai," an ti.

MZP hian Borapansury-a an sak Zofate Chawlhbuk an tlawh a, chawlhbuk leh a chhehvel an sam fai. Kum 2014 khan Borapansury-ah hian ram venhimna atan leh CADC hi Mizoram chhung ngei a ni tih lantir nana Zofate Chawlhbuk hi sak a ni. A ram hi a ṭhenawm ramten an neka a lan avangin teh ṭhat a ni a, YCA, Borapansury Zone hruaituten a hmunah an enpui.