Zir sang ni ringawt loa ràwntlak leh hnathawk thei nih tum turin chah

Minister Vanlalhlana chuan nimin khan Govt. J Thankima College Cultural Day cum GJTC Fest a hmanpui a; zirlaite chu zir sang ni ringawt loa mi thiam, ràwntlak leh hnathawk thei nih tum turin a chah.

Vanlalhlana chuan, J Thankima College-in Mizo hnam ziarang phochhuahna hun an buatsaih chu lawmawm a tih thu a sawi a, "Aia upa zah, ṭhian chhan thih ngam leh tlawmngaihnate chu kan chhawmnun a, kan chawisan a pawimawh. Kan eizawnnate hi Mizoram chhungah chauh duhtawk loin ram pawn lamah inzarpharh a ṭul. Dikna leh rinawmna ngaipawimawh ula, zir sang ni ringawt loa mi thiam, rawntlak leh hnathawk thei nih tum ang che u," a ti a; lehkhabu chauh ni lo, khawvel thiamna dang hmang inzir turin a fuih.

Minister hian college tihhmasawnna atan a MLA Fund aṭangin Rs 5,00,000 a pe a; hnam ziarang intihsiaknaa lawmman a sem nghal. College principal Prof. JV Nunchunga leh Alumni Association aiawhte'n thu an sawi bawk.

Bawngkawn leh Durtlang khawtlang mipuite din college pahnih - J Thankima College (1993) leh Lalhmingthanga College (1992) kum 2002-a chhunfin a nih khan L&J College tih a ni a; kum 2007-ah J Thankima College tih niin NAAC tehna hnuhnung berah A+ hmuin, Mizoram sorkar college zinga A+ hmu thei awmchhun an ni. Zirlai 1,090, teaching staff 41 leh administrative staff 12 an awm mek a ni.