MLA hoin Lunglei District Jail tlawh

Jail Visiting Board member-te chuan nimin khan Lunglei District Jail an tlawh a; Lunglei West bialtu MLA T Lalhlimpuia'n a telpui. Lunglei District Jail-ah jail tang leng thei tur zat aia mi 45-a tam an tang mek tih tarlan a ni.

Lunglei District Jail hi September 19, 1977 aṭangin luah ṭan a ni a; District Jail-a tang awm thei tur zat ruahman - mipa 99 leh hmeichhia 10, avaiin 109 a nih laiin, tunah hian mipa 129 leh hmeichhia 25 an tang mek a, an vaiin 154 an ni. Hei hi tang leng zat tura duan aiin mi 45-in an tam.

T Lalhlimpuia chuan, Lunglei District Jail building rawp tawh leh staff indaih lohnate chu veiawm a tih thu a sawi a, "Tunah hian jail sak ṭhatna tur DPR pawh buatsaih mek a ni a, sorkar tharah chuan District Jail-in heng harsatna a neihte hi sutkian a nih theih ngei ka beisei," a ti.

Jail tang tam tak chu sual vang aimahin vanduai vanga tangte an nih thu sawiin Bialtu MLA chuan, "Sorkar chuan jail tangte tan thiamthil zirna tur ruahmanna a siam mek," a ti a, jail tangte chu an tan chhung hun hmang a, an chhuah hunah pawh leirem rapa, nun kawng ṭha zawha, chhungkua dinin India khua leh tui ṭha in ni leh thei tih hre reng turin a chah.

He hunah hian jail tangte'n an harsatna leh ngaimawh hrang hrang an sawi bakah, jail enkawltute pawhin an mamawh hrang hrang an lo thlen a; jail tangte tan Mental Health Camp buatsaih nghal bawk a ni.

Lunglei District Jail dinhmun
▶ Mipa 99 leh hmeichhia 10, an vaiin mi 109 tang thei tura siam a ni.
▶ Tunah hian mipa 129 leh hmeichhia 25, an vaiin mi 154 an tang mek.
▶ Thawktu indaih lohna a nasa hle a, warder pakhatin tang paruk veng tura Manual-in a tih laiin, 100 chuang an ven ngaihchang a awm ṭhin.
▶ Thawktu dah belh mai bakah, sanction post (warder bik-ah) siam belh an mamawh.