FMR ṭhiah leh ramri hung tum kan dodal tlat dawn - MNF

MNF chuan thu­chhuah siamin, central sorkarin Free Movement Regime (FMR) a ṭhiat leh India leh Mynamar ramri hung a tum chu an dodal tlat dawn thu an tarlang.

MNF tarlan danin, central sorkarin tunhma aṭanga tih a tum sorkar kalta MNF kaihhruaiin a do tlat chu sorkar thar a awm tak chinah na leh zualin hma an rawn la a, Myanmar nena Mizoram inrinaa zalen taka khawsak theihna FMR pawh Manipur Chief Minister duhdan angin a rawn titawp nghal. Ramri hung hna pawh thawh a tum nasa hle.

Mizoramin sorkar a neih mek chu central-a BJP kaihhruai sorkarin a zuam hle nia an ngaih thu tarlangin MNF chuan, "A zuamna turin tun in­thlanpui kan hmachawn lai khan puanhnuai thil an nei a nih ngei pawh a rinawm hle," an ti.

MNF chuan FMR leh ramri hung chungchanga Chief Minister ṭanna leh thusawi ṭhin chu rinhlelhawm an tih thu tarlangin, "Ngaihṭhat thlak lo kan tiin, duap aw puah kan ngai tlat. India ram hotu luber venghimtu nia alo insawi tawh ṭhin chu tun hun hi huai taka a hman hun turah kan ngai," an ti.

FMR leh ramri hung chungchanga NGOCC hmalakna an thlawp tlat tih tarlangin MNF chuan, nghet taka ding a, ram leh hnam chhan nana chak taka hma la chhunzawm zel turin duhsakna an hlan.

MNF tarlan danin, a hunlaia thil thleng, khawchhak lama kan unau ṭhenkhatte khawsak phung avangin ram mipuiten khawchhak lam aṭanga lo chhukte ninna nasa tak a awm avangin ramri hung ṭul tihna hi alo awm tawh ṭhin. Tlawmngaipawl ṭhenkhat pawhin umchhuah kawngah sorkar nawrin, nasa takin hma an la tawh a ni.

Chuvang chuan MNF chuan Assembly House-ah bill pulutin, a lo pass tawh. Bill pass chu a hmalak tawp chin niin, kan unaute nen inpumkhatna a taka kalpui kawnga harsatna siam thei a nih tih hriain, hemi kawngah hian MNF kaihhruai sorkar chuan hma ala zui ta miah lo.

Tun ssrkar kalta ah pawh hemi kaihhnawih kan unau rawn raltlante kutzung chhinchhiahna siam(Biometric Enrollment) ti tura central sorkar nawrna pawh Cabinet meeting-in a lo hnawl tawh a ni.

MNF chuan kan unau Myanmar a awmte pawh kan impumkhatna leh unau na ti chhe zawng leh ruihhlo chi hrang hrangte Mizoram kal tlang tur leh Mizoram chhunga rawn la lut tawh lo turin an ngenin an hriattir.