KHAWTHLIR
V Day pualin thisen pe hnem
Association for Voluntary Blood Donation (AVBD), Mizoram State AIDS Control Society (MSACS), Blood Center - Civil Hospital, Aizawl leh Music Domain Mizoram (MDM) ṭangkawpte'n nimina Valentines Day puala thisen pek runpui an buatsaihah district hrang hrangah mi 1,031 in a thlawnin thisen an pe. Thisen petute hi mipa 691 leh hmeichhia 340 an ni. Thisen hi Civil Hospital, Aizawl tan unit 274, Synod Hospital tan unit 156, ZMC tan unit 127, district hospital - Lunglei tan unit 138, Champhai tan unit 113, Kolasib tan unit 102, Serchhip tan unit 19, Siaha tan unit 52 leh Lawngtlai tan unit 50 a ni.
CM Relief Fund
Chief minister Lalduhoma hnenah nimin khan pawl pathumin Chief Minister Relief Fund atan Rs 36,000, ZPM General Headquarters Organising South Department-in Rs 6000, RUSA Assistant Professor Association, Mizoramin Rs 20,000 leh Mizoram Movement for Old Pension Scheme-in Rs 10,000 an chhunglut.
Pa khawi zir
Van Vigyan Kendra (VVK) hnuaia ni thum awh tur pa khawi training chu nimni khan Bethlehem Vengthlanga ICFRE-BRC conference hall-ah Mizoram Youth Commission chairman Malsawmzuala Ralte-in a hawng. Malsawmzuala chuan training tura Armed Veng South leh Bethlehem Vengthlang aṭanga kalkhawmte chu sum lakluhna hnara hmang thei tura zir turin a chah a, "Taimakna, thawhrimna leh tei rei peihna nen in hlawhtlin hma chu engmah in kawng daltu a awm phal suh u," a ti.
Sangha man ru
Maubawk Branch YMA chuan February 13, Thawhlehni tlai khan Tlawng luia an humhalh chhunga sangha man ru an awm tih an hriat avangin lui hi an pan a, sangha man rutute erawh an lo bibo hman. YMA-te hian lenkhanga tang mek sangha kg. 15 vel, lenkhang pathum, tube rubber board leh maupûm an hmu a; sangha man rutute hi man chhuah an nih theihna atan Fisheries dept.-ah complaint an thehlut nghal.