ZPM party-in hruaitu thar an thlang; President-ah Lalliansawta thlan tlin a ni

Zoram Peoples Movement (ZPM) chuan kum 2024-2027 chhunga an party elected office-bearer (OB) tur Baptist Centre, Falkland-ah an thlang a, president atan president ni lai Lalliansawta an thlang.

ZPM OB inthlan tur atan hian official nomination siam a ni loa, floor aṭanga vawrh chhuah tura tih niin, president atan mi pahnih nominate an ni. President thlannaah hian vote 4,491 tlain, chu'ng zinga 12 chu vote thi a ni. Lalliansawta'n vote 2,528 hmuin, VL Zaithanzama chu vote 589-in a hneh.

Vice president atan mi pathum - treasurer ni lai C Lalṭanpuia, W Chhuanawma leh C Lianlungate nominate an ni. Vote 3,911 tlain, chung zinga 49 chu a thi a, vote 1,735 hmutu W Chhuanawma thlan tlin a ni.

Nominate tamna ber treasurer-ah chuan mi panga - SL Ngursailova, Lalchhuanthanga, Saithuama Mangpa, C Lalthanfela leh R Lalchhuanmawiate nominate an ni. Lalchhuanthanga chuan vote tla 3,337 aṭanga vote 1,489 hmuin a tling a, vote thi 25 a awm.

ZPM OB atana thlan tlin zinga mi W Chhuanawma leh Lalchhuanthanga hi MLA ni lai an ni. W Chhuanawma hi dy. govt. chief whip niin, Lalchhuanthanga hi ZPM Legislature Party treasurer ni lai a ni.

President atana thlan Lalliansawta hi presi­dent ni lai a nih bakah ZOHANDCO chairman a ni a, ZPM a din tirh aṭangin president dinhmun hi amah chiahin ala chelh.

ZPM hian vawiin hian an party executive member tur Dawrpui Multipurpose Hall-ah an thlang leh dawn a, mi 100 thlan tur a ni.