Burma Advocacy Group-in CM lawmthu hrilh

Chief minister Lalduhoma chu February l4, Nilaini khan a pisaah Burma Advocacy Group (BAG) hruaitute'n an kawm a; Burma aṭanga raltlante ṭha tak leh duat taka Mizo mipuite'n an lo tuamhlawm avangin lawmthu an hrilh.

Lalduhoma chuan, tunhnaiah Delhi-ah Union Home Minister a kawm thu sawiin, "Raltlante kan chhawmdawlna kawngah a ṭul anga min puih a inhuam thu min hrilh a. Kan unau, rambuai vanga himna zawnga rawn raltlante hi kan theih ang angin kan ṭanpui zel dawn. Kan tlawmngaipawlte, kohhran leh mimalte pawhin nasa takin an ṭanpui a ni," a ti a; raltlante chungchanga hmalakna tharte a lo hrilhfiah.

BAG hruaitu Rev. Dr Roy Medley chuan Baptist Church leh Burma mipuite hian kum 200 dawn inzawmna an neih tawh thu a sawi a, "Tuna an harsatna leh mangannate hi kan vei em em a, kan theih ang tawka ṭanpui kan duh a, Mizoram mipuite'n in lo tuamhlawmnaah pawh kan lawm hle a ni. Anmahni ṭanpui zel tura in thawhpuina pawh kan ngen a ni," a ti.

Burma Advocacy Group-te hi American Baptist Churches of USA leh US-a awm Chin Baptist Church-te, Karen Baptist Church-te, Baptist Union of Norway leh an thawhpui pawl hrang hrangte an ni.