Chief Minister-in Mipui Aw a tlangzarh; Mipuite aw ngaithla turin kan inpeih - CM

Mizoram State Public Grievance Redressal & Moni­toring System thar 'Mipui Aw' tih chu nimin khan chief minister Lalduhoma'n CMO conference hall-ah a tlangzarh a, a kaihhruai sorkar chu mipuite aw ngaithla tura an inpeih reng thu a sawi.

Chief Minister chuan mipui sorkar, langtlang sorkar an din theih nan mipuite nen inpawhna ṭha tak neih a ngai tih sawiin, "Mipuite ngaithla turin kan inpeih at reng. Keimahni duhna aia mipuite duhna dah hmasak hi kan inhuam a ni. Chu chu mipui rorelna ram democracy innghahna pawimawh a ni. Chumi hmanrua atana ṭangkai tak tur Mipui Aw thar kan hawng thei ta hi a lawmawm," a ti.

He online portal hian a hmangtu mipuite tan leh a lo chhangtu turte tan awlsamna a thlen ve ve dawn tih sawiin Lalduhoma chuan, "Mizo ṭawng leh Sap ṭawnga hman theih ve ve a ni. He portal hmanga zawhna leh dilnate chu a changtu nodal department-te pawh lo ngai pawimawh turin ka chah che u," a ti a, ram mipuite rawngbawlna pawimawh tak a ni tih hre chunga an kalpui dawn thu a sawi.

Chief Minister chuan Mipui Aw chu Mizoram mipuite'n ṭangkai takin hmang se a duh thu sawiin, mipuite tana lo inhawng hle turin a viltu tur officer-te pawh a chah nghal.

Thusawitu dang DPAR minister K Sapdanga chuan Mipui Aw hi 1.3.2012 khan a version hmasa lo hman tawh a nih thu sawiin, "Kum 2019 laihawl aṭang khan security thilah a him tâk loh avangin kan hmang zui ta lo. Hun eng emaw chen kan neih loh hnuin tunah Chief Minister hmalakna zarah a thar ṭha zawk kan nei ta a, a lawmawm hle a ni. Mipui Aw hi sorkar ṭha kan neih theihna tura Mizoram mipuite sorkarin a chona a ni," a ti.

Mipui Aw hi khua leh tuite'n an harsatna, an vuivaina leh an chanvo te an zawhfiah theihna tur a ni a; a address chu www mipuiaw.mizoram.gov.in a ni.