HM-in police thar din turin police-te a sawm; Post loa awmte an haw khawm - K Sapdanga

Mizoram Armed Police Association (MAPA) chuan nimin khan Aijal Club-ah khawmpui an hmang a, an hun hmanpuitu Home minister K Sapdanga chuan Mizoram thar a awm theihna atan police thar din turin MAPA member-te sawmin, "Police an post loa awmte pawh an haw khawm mek e," a ti.

Home Minister chuan, sorkara mawhphurhna a chan hlimah khawchhak lam leh khawthlang lama border out post (BOP)-te a tlawh thu sawiin, "BOP-ahte hian awm zat tur an awm hlawm lo. Ramri vengtute awmnaah current luh lohnate, hla taka tui chawi ngaihnate a awm. Chuti chung chuan BOP-a awmte an vui loa, an chhehvel mipuite pawhin an thlamuanpui," a ti a, an epah an elpuite bûk lian tak takah awm mah se, an zam loh thu a sawi.

Khaw hrang hrangin BOP an dil nasat thu sawiin K Sapdanga chuan, "Hei hian kan police-ten thlamuanpui tlakin hna an thawk tih a tilang. Indaih ila pek vek mai a chakawm, a ngaihna a awm rih si lo," a ti.

Home Minister chuan police post ruak hnawhkhah loh 4,000 chuang a awm tih sawiin, "A hrehawm duh hle. Mah se, DGP hnenah post ruak lam rilrua dah rih lo turin ka ti, a nih loh chuan sorkar sum dinhmun avangin a ngaihna a awm rih chuang lo. Mi 8,100 vel awm mekte hi fit taka kan awm chuan Mizoram tan kan ṭha tawk," a ti a, a awm ang angte'n Mizoram mipui leh ram tan theihtawp chhuaha hma an lak dawn thu a sawi.

Home Minister sawi danin, police indaih lohna a nasat avangin police officer-te chu an hah em avangin an entitled bak police leh lirthei kawl phu viau mah se, tihngaihna a awm lo. Chuvangin, mahni entitled bak kawlte chu February, 2024 chhunga an kawlte chhuah a, hawkhawm runpui buatsaih ni se, tih a ni. Police officer-te pawh an phur khawp a, tunah hian haw khawm turte an haw khawm kim thawhkhat tawh.

Police officer pension tawhte pawh kum hnih khat chu orderly leh lirtheite nen duat chhunzawm rih chakawm viau mah se, police indaih lohna avangin an duat thei lo. Chutiang lo kawlte chu dahlet tura tih an ni.

Hawkhawm runpui zawhfel a nihah discipline leh fitness ṭan an lak dawn thu sawiin K Sapdanga chuan, "Fitness hi mitin tan a pawimawh a, police-te tan a pawimawh lehzual. Theihtawp kan chhuah anga, kan fitness kan tipung ang. Raldo tura lak kan ni a, kan chhehvelah ralin min hual a ni. Kan Indian puite ngei ngeiah pawh ral kan nei. Kan mawhphurhna a zauin a tam takzet," a ti.

Home Minister chuan kan tan, ram tan leh mipui tan police-te chu insumin, an in fit tur a nih thu sawiin, "Rambuai lai khan kan police-te India rama ṭha ber an ni a, tih theih loh nei loah an ngai ṭhin. Kan ute hnung i zui leh ang u. Kan uniform-te nawt mar ṭha lehin, kan silaite i tuaihnum ṭha leh ang u," a ti a, MAPA member-te chu Mizoram thar din tura police thar dinpuiah a sawm.

Khualzahawm IGP (Hqrs.) Lalbiakthanga Khiangte chuan armed police-te chu silai nena awm tur an nih angin an silaite ning lo tura chahin, "Security leh traffic police-a awm dilte an tam riau mai, BOP a awm kan hreh vang em ni? Hmun hnem zawk thlahlel suh u. Silai nena kan mipui leh ram tana hnathawh hi nuam ti rawh u," a ti a, taksa sawizawi uar tur leh an taksa mamawh bak an ka-ah luhtir lo turin a chah.

MATA khawmpui hi president inspector Kawlsailova'n kaihruaiin, GS SI R Lalthianghlima'n report pein, chawhnu lamah ro an rel bakah hruaitu thar an thlang.