Kan sorkar leh thuai kan ring - MPCC President

MPCC chuan nimin khan Congress Bhavan-ah political session an hmang a, thusawitu MPCC president Lalsawta chuan, "Kan sorkar leh thuai kan ring," a ti.

Lalsawta chuan, Pathianin ram leh mipui a pek thu sawiin, "Pathian lam kan hawi ang a, kan duh hi Pathian duh nen a inmil thlap a nih chuan kan hlawhtling ngei ang. Kan party kal zelna turah kan ram tan a ṭha em, mipui tan a ṭha em tih hi in zawh reng tur," a ti a, an sorkar leh thuai dawn tih an rin tlat thu a sawi.

Hun tharah an lut a, hun hlui chu a liam tawh tih sawiin MPCC President chuan, "Congress Party pawhin Mizo mipui, a bikin ṭhalaite hip zawnga party kalphung kan her danglam a ngai ta. A hun a lo thlen hi chuan a hunlai mamawh mila kan inher danglam a ngai a ni," a ti.

MPCC President chuan an party-in Zoram mipui tan hmathlir thui tak an neih thu sawiin, "Chu kawng ṭha leh ram dinchhuahna chu zawhpui kan tum a ni tih kan hriattir dawn," a ti a, mipuiin ram an hmangaih tak zet tih an hriat theih nan an nun aṭanga hmuhtir turin an party mite a chah.

Lalsawta chuan president a nih chhunga an party mite ṭawiawmna leh inpeknaah lawmthu sawiin, hruaitu tharte chungah pawh lantir zel turin a ngen nghal.