KṬP Day vawi 71-na an lawm

Nimin February 16, Zirtawpni kha KṬP Day vawi 71-na a ni a, Mizoram chhung leh state pawna branch tam takin lawmna hun an hmang.

KṬP Day hman dan tur hi Central KṬP Committee chuan ruahmanna hrang hrang a siam a, biak-in hung chhung hmun remchang laia KṬP flag tar, biak-in leh a vel tihfai, veng chhung tihfai, mi harsa leh damlote ṭanpui, thisen pek leh a remchan anga KṬP thil tum leh thupui zirho tihte an ni. Heng bakah hian branch-in mahni remchan dan angin an hmang. Zing kar leh chhuna hun hmang an awm bakah, nizan lama hun hmang pawh an awm.

KṬP din theihna tura hma latu, Provisional Committee-in Synod Standing Committee-ah KṬP din an dil a, Synod Standing Committee chuan February 16, 1954 khan a pawm a, Synod Standing Committee-in KṬP a pawm ni hi KṬP din ni-ah pawm a ni.

Presbyterian kohhran hnuaia ṭhalai pawl, KṬP inchhiarna hnuhnung bera a lan danin, tun dinhmunah branch 898 awmin, member 1,65,089 an awm a, mipa 1,01,742 leh hmeichhia 63,347 an ni.