Inelna rilru thianghlim pu chungin lehkha zir ang che u - Sports & Youth Services Minister

Govt. J Thankima College (GJTC) chuan nimin khan Vanapa Hall-ah Annual College Week Closing & Miss/Mister Contest an hmang a; Sports & Youth Services (SYS) minister Lalnghinglova Hmar-in hmanpuiin, "Vawiina in zirpuite hi nakina in la elpui turte an nih avangin rilru nei tak, inelna rilru thianghlim pu chungin lehkha zir ang che u," a ti.

Lalnghinglova Hmar chuan, India ram khawchhak kilkhawra awm Mizoram chuan state dang nena inhrutrualin Indian Standard Time (IST) a hman thu a sawi a, "Kan thlang lawka awm Bangladesh aiin darkar chanve in kan tlai a, ramri kan ṭawmpui Myanmar aia darkar khata kan tlai sa bawk avangin midang ruala ke pen tur chuan zingkar aṭanga hun hman ṭangkai a pawimawh," a ti a; zirlaite chu zingah tho hmaa, an hun neihte hmang ṭangkai turin a chah.

J Thankima College-a zirlaite chu Mizoram chhung leh pawn hmun hrang hrang aṭanga kalkhawm, dinhmun inang lo tak tak an nih thu sawiin Minister chuan, "Lehkha zir tura Aizawl khawpui pantute'n in kal chhan hria ula, social media leh nawmchenna dangte buaipui loin, hmasawn theihna tur thil tak tak ngaihtuahin buaipui ang che u, " a ti.

Lalnghinglova Hmar chuan zirlaite chu mahni nihna hrechianga zahpui lote chu khawvelin a ngaisang ṭhin tih hrilhin, "Nakina dinhmun pawimawh tak tak chelha hnam dang leh ram dang mite hnena Mizoram leh Mizo chanchin phochhuaktu in la ni dawn a, Mizoram chanchin, a bikin history, geography leh politics-te zir peihin hrechiang ang che u," a ti a; zirlaite chu ruihhlo leh zu laka inthiarfihlim turin a chah bawk.

He hunah hian GJTC principal Prof. JV Nunchunga pawhin thu sawi. Govt. J Thankima College-ah hian zirlai 1,090 an awm mek a ni.