Cooperative society chungchang sawiho

Champhai District Cooperative Development Committee chuan nimni khan an chairman James Lalrinchhana, bawrhsap kaihhruaiin cooperative society dinhmun leh hmalak ṭulte an sawiho.

James Lalrinchhana chuan, a theih apiangah sorkar department-te ṭang tlanga thawhhona (convergence)-a hna kalpui ṭhin a ṭul thu a sawi a, "India ram hmun hrang hrangah cooperative movement kaltlangin hmasawnna tam tak hmuh a ni tawh a, Mizoram leh Champhai district-ah pawh kan economy tihhmasawnna kawngah leh mi harsa zawkte dàwm chhuahna kawnga hmanraw pawimawh tak ala nih ngei ka beisei," a ti.

Ṭhukhawm chuan damdawi hrang hrang man man zawka hralh chhuahna sorkar laipui scheme, Pradhan Mantri Jan-Aushadhi Yojana din turin hmalak ni se, bawng vulh leh sangha khawi lama District chhunga Cooperative hnuai hmalak theihte leh bank-te nena ṭanrual theih dante zirchian ni bawk se, an ti a; Champhai District Milk Producers’ Co-operative Union Limited (CHAMUL) chu kalpui chhunzawm zel a nih theih nan leh ṭul leh pawimawhte bawhzui turin district cooperative officer B Lalchhanhima leh district AH&Vety officer Dr Lallawmsanga Tlau-te an ruat.

Champhai District Cooperative Office hnuaiah hian Champhai district leh Khawzawl district bakah, Ngopa RD Block chhunga cooperative society 216, Large Area Multipurpose Societies (LAMPS) pakhat leh District Level Cooperative Society pahnih an awm mek a ni.