Thlai thar kût cum exhibition

Serchhip District Horticulture office chuan nimin khan Serchhip Bazarah 'Thlai thar kût cum exhibition' an buatsaih a; Horticulture secretary K Lalrinzuali'n a hawng.

K Lalrinzuali chuan, kut hnathawktute an zahawm thu a sawi a, "Nasa takin an zar kan zo a ni tih hi hre thar zel ang u. Kut hnathawktu hlawhtling tak takte hlawhtlinna hi sorkar puihnaa innghat ni loin, an taimakna leh an rinawmnaa innghat a ni zawk. Sorkarin a lo tih ve ber chu hnathawktu taimate'n hlawk zawka an tharchhuah theih nan a tihdan phung zirtir a ni," a ti.

Serchhip district-a kut hnathawktute chu Mizoram chawmtu ni thei tura ṭan la lehzual turin Lalrinzuali chuan a sawm a, Horticulture department-a thawktute pawh loneitute chu an mi pawimawhte an ni tih hriaa duat tur leh ṭha taka hna an thawh hian a rah chu loneitute aṭangin a lo lang ṭhin tih a sawi bawk.

Exhibition-ah hian intihsiakna pathum - floriculture, vegetable leh spices & fruits buatsaih a ni a, mi 77-in an thlai tharte an phochhuak a ni.