Information service-in khawmpui an hmang

Information & Public Relations (IPR) minister Dr Vanlalthlana chuan nimin khan IPR Auditorium-ah Mizoram Information Service Association (MISA) Annual Conference 2024 a hmanpui. MIS cadre sanctioned post 36 aṭangin 25 (69.44%) chiah hnawhkhah a nih thu tarlan a ni.

Dr Vanlalthlana chuan, IPR department chu mipuite hriat tur information pek chhuah mai bakah inlaichinna ṭha, public relations kengkawhtu a nih thu a sawi a, "Sorkar, mipui leh media-te inkarah inlaichinna ṭha zawk a awm theih nan public relations nihna vawngnung zel ang che u. Thawktu indaih lohna avanga harsatna tawhte sutkian a nih theih nan hmalak chhoh mek zel a ni a, ram leh mipui rawngbawl kawngah infinchhuah tawn zel a ṭul," a ti a; sorkar laipui leh corporate-te nen inlaichinna ṭha zawk a awm theih nan relationship manager siam kawngah ngaihtuahna sèn tlàn a ṭul thu a sawi.

Sorkar thu leh hla, scheme leh hamṭhatnate zau zawka mipui hnena puanzar kawngah media platform hrang hrangte ṭangkai lehzuala hman a ṭul thu sawiin IPR Minister chuan, "Tunlai thiamna chhuak thar leh ṭangkai tak takte chiang zawka hmelhriata hman ṭangkai zel tum ang che u. Sorkarin a ngaih pawimawh em em Sustainable Development Reform Policy (SDRP) leh sorkar policy-te ngaihven tlâng ula, mipuite'n an ṭangkaipui theih nan zau zawka puanzar kawngah ngaihtuahna seng zel ang che u," a ti.

He hunah hian IPR secretary Teresy Vanlalhruaii, MISA president F Lalfakzuala leh MISA patron C Lalnunkima, IPR director-te'n thu an sawi a; MIS officer tharte inhmelhriattirna leh kum 2024-2026 chhunga MISA hruaitu tur thlanna neih a ni bawk.

Kum 2024-2026 chhunga MISA hruaitu thar atan president-ah Malsawmsanga leh general secretary-ah Andrew H Lalremruata te thlan an ni.