KHAWTHLIR

Minister-in enpui

Transport minister Vanlalhlana, Mizoram Road Safety Council chairman ni bawk chuan nimin khan Aizawl Chanmari kawnah 'No Tolerance Week' denchhena lirthei endikna hmun tlawhin an hmalaknate a enpui. Aizawla No Tolerance Week kalpuiah hian February 15, 2024 thleng khan mi 169 man niin, a hmuna pawisa chawitir mi 139 an awm a; an pawisa chwi tlingkhawm hi Rs 4,65,000 a ni.

Hmun hnihah Ganja man

Excise & Narcotics department chuan February 15, Ningani khan World Bank Road, ITI Vengah ganja kg. 3.125 leh a neitua puh Lallawmawma (29), Zemabawk Veng nia inchhal an man. Nimin zing pawh khan Excise dept. hian Zemabawk Quarry-ah ganja kg. 16.91 an man leh a, a neitua puhte chu Mercy Zoengmawii (26), Sesawng leh Laldawngsanga (28), Hmar Khawlian, Assam nia inchhalte an ni.

MZU-ah tlangzarh

Mizoram University vice chancellor Prof. Dibakar Chandra Deka chuan February 15, Nilaini khan a pisaah MZU-a Centre for Distance and Online Education hnuaia Skill Enhancement Course a tlangzarh.

NGHAM ṭhukhawm

Nimin chawhnu khan Non-Government Hospital Association of Mizoram (NGHAM) chuan Aijal Club-ah meeting an nei a, an pawl kal zel dan tur leh sorkar thar nena ṭha taka midang tana malsawmna nih zel theih dan turte an sawiho. Kum 2024-2025 chhunga an pawl hruaitu tur thlang nghalin, president-ah Dr Lalrintluanga Jahau (Trinity Hospital director) leh secretary-ah C Hmingthanmawia (City Hospital director) te thlan an ni.

Heroin man

Assam Rifles leh Zokhawthar Police ṭangkawp chuan February 15, Ningani khan Dawngliana (40), Khawzawl Dinthar Veng nia inchhal hnen aṭangin Zokhawtharah heroin gram 480 an man.

NH 302 enfiah

Lunglei district bawrhsap Ramdinliani chuan nimin khan Lunglei district-a national highway 302 kawng siam mek a tlawh a; kawng siamtu BNR Construction leh NHIDCL hotuten an hnathawh kal mek leh harsatnate an lo thlen. Ramdinliani chuan Tlabung - Lunglei inkar kawng chu April thlatir aṭang chuan darkar 3-a thlen hman ngei a nih theih nan theihtawp chhuah turin a hrilh a, Phairuangkai lei siam mek a endik nghal.