Kan lungawina hi a hniam lutuk chuan hma kan sawn thei dawn lo - Supply Minister

Food Civil Supplies & Consumer Affairs (FCSCA) minister B Lalchhanzova chuan February 17, Inrinni khan Kawnpui Bangla Vengah MIZOFED Filling Station thar a hawng. Supply Minister chuan, "Kan lungawina hi a hniam lutuk chuan hma kan sawn thei dawn lo a, lungawina tih sàn a ṭul," a ti.

B Lalchhanzova chuan, a huhoa sumdawnna chu mi changkangte kal­kawng a nih thu a sawi a, "Cooperative society leh a peng hrang hrangte hi a huhoa sumdawnna a ni a, kan ram kan hnam hmasawnna tura rahbi pawi­mawh tak a ni. Mipuite'n hmalam kan pana, kan ngaituahna pawh kan ti sang ngam tur a ni. Kan lungawina hi a hniam lutuk chuan hma kan sawn thei dawn lo a, lungawina tih sàn a ṭul," a ti a, ram tana thil ṭha titu nih tum turin mi tin a chah.

Remchanna zawn zel tur a nih thu sawiin Supply Minister chuan, "Mi dang min pek leh min chhawpchhuahsak hun kan nghak tur a ni lo a, a zawna kan zawn a ṭul. Kan vaiin customer care kan ni a, a tawp ṭhak thlengin customer care hi a pawimawh hle a ni tih kan hre tur a ni," a ti.

He hun hi MIZOFED chairman K Rothangpuia'n a kaihruai a; Tuirial bialtu MLA K Laldawngliana leh Kawnpui Jt. VC chairman H Lalfakzuala-te pawhin thu an sawi a ni.