KHAWTHLIR

Thisen pe

February 17, Inrinni khan Tuipuiral Zirlai Pawl-in an din champha vawi 38-na pualin Aizawlah thisen pek an huaihawt a, Civil Hospital, Aizawl tan mipa 56 leh hmeichhia 13-te'n thisen unit 69 an pe. Inrinni vêk khan KṬP, Ramhlun Vengchung Branch-in Synod Hospital tan thisen unit 30 an pe a, petute mipa 24 leh hmeichhia paruk an ni a; ṬKP, Haulawng Bial pawhin Lunglei Civil Hospital tan BCM, Bethel Kohhran Sunday School Hall, Haulawngah unit 56 an pe a, petute mipa 47 leh hmeichhia pakua an ni.

Minister-in tlawh

Supply minister B Lalchhanzova chuan kum 2020 aṭanga thuam ṭhat angaih vanga khar rih mek, Mualkhang Gas Bottling Plant chu February 17, Inrinni tlai khan a tlawh a; sorkarin eirawngbawlna gas hnianghnar zawk a awm theihna turin a tih tur ang ang chak takin a ti zel dawn tih a sawi.

Rs 2,00,000 hlan

Mizoram Co-operative Apex Bank hotute chuan February 17, Inrinni khan chief minister Lalduhoma chu a pisaah kawmin, harsatna leh mamawh an neihte an thlen a; Chief Minister Relief Fund atan Rs 2,00,000 an hlan nghal. Chief Minister chuan lawmthu hrilhin, bank hmasawnna tur mamawh an sawite chu felfai taka ziaka a hnena thlen turin a hrilh.

Inelna hawng

Mizoram Youth Commis-sion (MYC) chairman Malsawmzuala Ralte chuan February 16, 2024 zan khan Chanmari YMA Hall-ah 'Mahindra XUV 300 LPS Cup 2024 inter village football tournament a hawng. MYC Chairman chuan, "Eng kawngah pawh hnathawhna, zirna leh infiamnaah pawh ni se, time table mumal tak siama a hun tak zela thil tih hi hlawhtlinna a ni," a ti.

Meth man

Excise department leh Bawngkawn Branch YMA ṭangkawp chuan February 17, Inrinni khan Bawngkawn Brigade-ah Hrangtinkhara (49), Myanmar tuna Bawngkawn Venga khawsa mek nia inchhal hnen aṭangin crystal methamphetamine kg. 1.30 leh methamphe-tamine kg. 16.105 an man. Ruihhlo hi Myanmar aṭanga lakluh, state danga hralh tum a ni.