Isua Krista duh danin Congress a kal zel dawn - Lal Thanhawla

Nimina Lal Thanhawla Auditorium-a Congress party zawm thar lawm luh inkhawmah thu sawiin Dr Lal Thanhawla chuan, "Pathian thuin min zirtir chu mi rethei zawkte ngaihsak a ṭanpui a ni. Khawvelah kut hnathawkte tel loin eng sorkar mah an kal thei lo. Mi rethei zawkte khaichhuah nan NLUP kan ruahman a, rangva in chung nei lote hnenah rangva kan sem ang kan ti a, mi tam takin min nuihzat a ni," a ti.

MPCC President chuan, miin nuihzat mah se, Isua duh zawng a nih avangin a mamawh zawng zawng deuh thaw hnenah in chung tur rangva kan pe a, NLUP hmangin mi rethei zawkte kan ṭanpui a ni. Hun lo awm leh zel turah pawh Isua Krista duh danin Congress party a kal zel dawn," a ti a; NLUP chu chhungkaw tam takin an dinchhuah phah thu a sawi.

Mizote chauh chu sakhaw lian ber ber pathum - Hindu, Muslim leh Buddhist-ten an hual vêl kara khawsa an nih thu sawiin Lal Thanhawla chuan, "Hnam puma sakhaw pakhat zawm awmchhun, min hual veltu sakhaw lian pathum laka nghet taka dinga inlet kual ve ngai lo hnam, Bible-in khawvel hmun tinah kala chanchin ṭha hril tura special taka din kan ni," a ti.

MPCC President chuan, chanchin ṭha hril turin ṭhenawm ramte nen inkalpawhna ṭha neih a ngaih thu sawiin, "Chumi atan chuan ruahmanna thui tak siamin hma kan la. Tuna kan chhehvel ramte nena insumdawn tawnna tur kawng laih mek leh ruahmanna awm mekte hi Congress sorkar laia bul ṭan vek a ni," a ti a; sorkar laipui pawhin an hmalakna chu a phûrpui ṭhin thu a sawi.

Congress party thu­chhuah tarlan danin, nimina inkhawmah hian an party-ah mi 10 lawm luh an ni.