Ramri hung leh FMR chungchangah CM leh NGO hruaitute an inkawm

Chief minister Lalduhoma chuan February 17, Inrinni khan CM Meeting Room-ah NGO Coordination Committee hruaitute a kawm a; Myanmar ramri hung leh free movement regime (FMR) ṭhiah tum dodalna chungchangah Chief Minister chuan, "Sorkar anga hmalakna te, NGO anga hmalaknate kan nei ang a, kan tihtlàn zel hi a ṭha," a ti.

Lalduhoma chuan, ZPM sorkarin Myanmar ramri hi hung chu ṭha an tih loh thu a sawi a, "Free movement regime-te pawh ṭha takin awm reng se kan duh. Tuna kan ramri hi British sorkarin divide and rule policy hmanga min barhluih ramri a ni a, unau min ṭhen hranga, kan hnam lian tak min pawtdarh," a ti a, pawm theih a nih loh thu a sawi.

An hmathlir leh duhaisam chu rorelna pakhat hnuaia awm a ni reng tih sawiin Lalduhoma chuan, "Tun hnaiah Delhi-ah ṭum hnih ka zuk zin a, Union Home Minister ka hmu ve ve a, minister pawimawh dangte pawh ka hmu a, an hnenah kan dinhmun hi ka hrilh. Tuna Myanmar ram dinhmunte hrilhin, Manipur lam hi in lo hung a nih chuan kan sawi phak a ni lo a, Mizoram erawh chu hung a rem lo tiin ka thlen," a ti.

Sorkar anga hmalakna te, NGO anga hmalaknate neih a nih tur thu sawiin Chief Minister chuan, "Kan tihtlàn zel hi a ṭha," a ti a, sorkar laipui hotute'n an lo dawnsawn danah thlamuang taka awm theih nia a ngaih thu a sawi.

NGO Coordination chairman Lalhmachhuana chuan, sorkar tharah a ṭha zawnga thil inthlak an hmuh chhoh zel avangin lawmthu a sawi a; NGO-te'n ramri hung leh FMR hlih an duh lohnate tilang tura punkhawm huaihawt an tum dan te, chutiang lam ngaihtuaha an thawhpui Nagaland lama NGO-te pawhin hma an lak ve mek thu leh palai an tirh thute Chief Minister hrilh bakah, an thil phûtte chu central sorkar leh Mizoram sorkar hnena ziaka an thlen tawh thute a sawi bawk.

Inkawmhonaah hian Bangladesh lama Zo hnahthlakte harsatna tawh mek te, Manipur aṭanga raltlan chungchang leh thil pawimawh dangte an sawiho a ni.