Sorkarin sum hnar tam zawk a neih theih nan hmalakna tur àwmte kan dap dawn - Chief Minister

Mizoram State Resource Mobilisation Committee chu an chairman Lalduhoma, chief minister hoin February 17, Inrinni khan CM Meeting Room-ah an ṭhukhawm a; Chief Minister chuan, sorkarin sum leh pai hnar tam zawk a neih theih nan hmalakna tur àwmte a dap dawn thu a sawi.

Lalduhoma chuan, sorkar hmasa khan Resource Mobilisation department din tum mah se, sum leh pai renchem a ngaih avang leh committee anga kalpui theih nia a lan avangin Resource Mobilisation committee an kalpui ta zawk tih a sawi a, "Sorkarin sum leh pai hnar tam zawk a neih theih nan hmalakna tur àwmte kan dap dawn a, inrenna lam te, sorkar hnathawkte rel felna te, dis-investment lam te, outsourcing lam te, chhiah hmuhbelh theihnate leh a ṭul anga administrative reforms thlengin kan hma chho dawn a ni," a ti.

Stamp duty lamah bul an ṭan nghal tih sawiin Lalduhoma chuan, "India rama stamp duty la hniam berte zinga mi ni chungin tlema tihsan hlek a ni. Kan kal chak theih nan sub-committee insiamte pawh a ṭha hial ang," a ti a; rawtna hrang hrang lutte chu ṭhutkhawm leh hunah sawiho ni se tiin rawtna a siam.

He hunah hian Mizoram State Resource Mobilisation Committee vice chairman Haukhuma Hauzel leh member secretary Ramchuana-te'n hma an lak tawhte an tarlang a; hmalak theihna àwm nia an ngaihte an sawiho nghal a ni.