Kohhran hruaitute tan vaihlo do training

National Tobacco Control Programme (NTCP), National Health Mission hnuaiah Mamit khawpuia kohhran hrang hrang hruaitute leh Pastor-te pualin tunhnai khan zuk leh hmuam leh a kaihhnawih do tura inzirtirna neih a ni a, NTCP nodal officer Dr H Lianthangpuia'n a telpui.

Dr H Lianthangpuia chuan, zuk leh hmuam ṭhat lohzia inzirtirna chu kohhran hruaitute aṭanga bulṭan ṭha an tih thu a sawi a, "Non-communicable disease (NCD) thlentu tam ber chu vaihlo leh a kaihhnawih niin, Mizorama thihna tam ber (67%) a thlen ṭhin. Zu leh damdawi ngawlvei zinga 90%-te bulṭanna chu vaihlo-meizial zuk aṭangin a ni," a ti a; hemi tih rehna tur hian Pathian thu aṭanga inzirtir uar a ṭul thu sawiin, kohhran hruaitute chu thawhpuiah a sawm nghal.

He hunah hian NTCP state consultant R Lalremruata pawhin vaihlo hman chung­changa Mizoram dinhmun, harsatna leh vaihlo do pawimawhnate a tarlang a; kohhran hrang hrang aiawhte chuan anmahni huam chhung ṭheuha zuk leh hmuam dona tura hma an lak dan leh hmachhawpte an sawi bawk.