Education Minister-in lawmpuina hlan

School Education minister Dr Vanlalthlana chuan February 16, Zirtawpni zan khan ZoCareer Solutions, Chanmari-in Mizoram chhunga pawl 12 Science subject zirlaite tana inelna a buatsaih - Pre NEET/SMATEE 2024-a tiṭha mi 10 leh tun hnaia ZoCareer Coaching Institute hnuaia hna hmu tharte hnenah lawmpuina a hlan.

Zirlaite chawimawina hun hi Govt. Hrangbana College conference hall-ah neih a ni a; khuallian Dr Vanlalthlana chuan, entrance pawimawh tak taka inziaktlingte chu an hmalam hun atan duhsakna hlanin, "In thil zirnaah a bul aṭangin ṭha takin ṭan ula, tumruhna nei ang che u. In hlawhtling nghal lo a nih pawhin teirei in peih phawt chuan hlawhtlinna in la sualchhuak ngei ang," a ti a; hnaruaka inziaktling chu Mizoramin thinlung thianghlim, mi taima leh mahni hna-a inpe a mamawh thu a hrilh.

He hunah hian ZoCareer Solutions managing director Lalhruaitluanga pawhin thu a sawi a; Education Minister hian Pre NEET/SMATEE 2024 top 10-te hnenah pawisa leh lawmpuina thuziak a hlan a, hnaruak hrang hranga tun hnaia inziaktling mi 18 hnenah lawmpuina thil pek a hlan bawk.