Aizawlah total lockdown pawt sei

Nimin chhun dar 1:17 khan Vanglaini palai zawhna chhangin chief secretary Lalnunmawia Chuaungo chuan, total lockdown pawh­sei a nih dawn leh dawn loh sawi a la awm rih loh thu a sawi. Hemi hnu hian sorkar thuneitute chuan total lockdown chungchang hi an ngaihtuah leh a, August 24 zing dar 4:30 thleng pawhsei an rel a ni. Sorkar hotute hnen aṭanga Vanglaini thudawn danin, niminah Zangena Filling Station-a thawk pakhat chu Covid-19 a vei tih hmuh chhuah a nih avangin meeting koh leh a ni a, contact tracing leh thil ṭul dang buaipuina atan total lockdown hi pawhsei a ni. 

Health & Family Welfare minister Dr R Lalthangliana hoa August 16, 2020-a sorkar hotute ṭhukhawmin Aizawl inkhàrkhip an rel ṭuma tih tur an ruahman angin, inkhàrkhip chhungin Aizawl khawpuiah swab sample random test tih a ni a; result hriat tawh chinah chuan random test-a swab sample lak aṭangin Covid-19 vei hmuh chhuah a ni lo. Vanglaini palai zawhna chhangin R Lalthangliana chuan, total lockdown pawhsei leh pawhsei loh chu Health department lam chan a nih chiah loh thu a sawi a, "A hmaa kan rèl kha chu Chief Minister hriatpuinain Home Minister-te nen kan rêl a ni. Pawhsei leh pawhsei zel loh chu kan department chan a ni lo," tiin, inkhàrkhip chuan ṭhatna leh ṭhat lohna a neia a hriat thu a sawi.

Health Minister chuan, inkhàrkhip an hman ṭangkai thu sawiin, "Total lockdown loh laia tih hleih theih loh tam tak kan buaipui hman. Mithiamte'n December 2020-ah chuan Mizoramah Covid-19 vei mi 5,000 vel awm tur angin an chhût a, a thlen dik palha kan buai lutuk lohna atan inbuatsaihnate kan nei a ni," a ti. Dr R Lalthangliana chuan, Aizawl khawpuia Covid-19 vei tura rinhlelh ni kher lo, mi náwlpui endik (random test) chhunzawm zel a nih dawn thu Vanglaini palai a hrilh. Zoram Medical College (ZMC)-ah RTPCR test kit sing chuang a awm mek thu sawiin, "Rawn thleng tur pawh a la awm zel a, hmanraw lamah chuan kan dinhmun a ṭha rih," a ti a; khawtlangah hriat mai loha Covid-19 vei an awm leh awm loh hriat nan Aizawlah random test tih zel tum a nih thu a sawi.

Health Minister sawi danin, Rapid Antigen Test (RAT) hmanrua pawh rawn thleng mai tur, a man pek lâwk vek tawh eng emaw zat a awm. RAT hmang hian Vairengte aṭanga Mizorama rawn lutte chu endik zel a ni dawn. Sample la khawmtute a hranpaa an awmna tur rua­hman mek a nih thu sawiin Dr R Lalthangliana chuan, "Anni hi an fimkhur em em a, chutih laiin, hmun ṭhenkhatah thinhrikte an hlawh ṭhin. Fimkhur thilah an awmna tur bik ruahman a ni dawn a, Tourist Lodge annexe building buatsaih mek a ni," a ti.