Party dang sawichhe vak lo turin ZPM President-in an mite a chah

ZPM party president Lalliansawta chuan, ZPM party mite chu political party dang sawichhiat vak vakte ti ve lo tur leh chapona lak ata inveng fimkhur turin a chah.

ZPM chuan an pisa chu kum 2020 chhung atan nimin khan an khâr a, khàrna inkhawmah hian an president Lalliansawta chu dam lohna vangin tel thei lo mah se, a thuchah chhiar chhuah a ni.

Lalliansawta chuan, hmun hrang hranga ZPM party mite leh Zoram mipuite chu Krismas leh kumthar hlim taka hmang turin duhsakna a hlân a, "ZPM party mite chuan party dang sawichhiat vak vakte ti ve lo ila, chapona lak ata i inveng fimkhur hrâm hrâm ang u," a ti.

ZPM vice president K Sapdanga chuan ZPM zawm tharte a lawm luhnaah thu sawiin, "MLA aṭanga Lalduhoma bàn a ni hi ZPM-in ná kan ti a, hriatthiam harsa kan ti. Thuneihna hmangin House aṭangin nawr chhuak mah se, mipui hmangin rang taka nawr luh leh kan tum. A pawi ta ber zawk chu, mi fel tak takte kut leh ká kher hmanga politics-a phuba lâkna a thleng hi a ni," a ti a; rorel lai thil tih dan chu an tu leh fate thlenga rilru tinatu la ni thei a nih thu a sawi.

AMC inthlan turah ZPM chu an inpeih tawh tih sawiin, "AMC kan inthlang mai dawn emaw kan tih laiin hripui léng chhuanlamin sorkarin inthlan hun a tikhawtlai a, hripui lèn vang ni loin, candidate an la hmuh kim loh vang zawk niin a lang," a ti.

ZPM Vice President chuan, "Sorkar lai kum chanve a liam chauh a, sorkara beisei tur la nei tan beiseina hun eng emaw chen la awm laia ZPM min rawn zawm ṭhin hi min hriat chian avanga min zawm nge, min hriat chian loh vanga min zawm ka hre lo a, kan auhlate hi nuai khat sem te, nuai thum sem tih lam ni loin, sawhthing hmun siam lamte a ni," a ti a; chuti chunga ZPM zawm duh an awm zel chu lawmawm a tih thu a sawi.