Chief Minister leh ZFDA hruaitute inkawm

Zoram Medical College Faculty & Doctors Association (ZFDA) hruaitute chuan nimin khan chief minister Lalduhoma chu a pisaah kawmin, Chief Minister Relief Fund atan Rs 40,000 an hlan.

Lalduhoma chuan ZFDA hruaitute'n mamawh an sawite a ngaihthlaksak a; ZMC-in National Medical Commission endikna a paltlang theih nana hma a lak dan tlangpui hrilhin, "Tun leh tuna mamawh nghal thilte lei nan Mizoram sorkarin cheng vbc 1.2 kan pe tawh a, a bak mamawh dangte leina leh thawhna tur pawh central sorkarah min phalsak angin fund kan dil. MP election model code of conduct an puan hma ngeia a hmahruai min rawn pek hman kan beisei," a ti.

National Medical Commission tehna thil tam takte chu Mizoram angah a tlin ve theih loh thute sorkar laipuiah a thlen thu sawiin Lalduhoma chuan, "Ngaihhnathiamna min pe turin ka ngen a, min tihsak pawh kan beisei, " a ti a; ZFDA thil thlen dangte pawh uluk taka a lo zirchian tur thu a hrilh a ni.

ZFDA hruaitute hian Chief Minister chu ZMC tana hma a laknaah lawmthu hrilhin, ZMC President a nih anga an hmunhmate tlawh turin an sawm.

Chief Minister hi adviser to CM TBC Lalvenchhunga, MLA-in a ṭawiawm a ni.