Revolutionary party hi kan inralrin a ṭul - MNF Treasurer

MNF chuan nimin khan an pisa-ah chhung inkhawm an hmang a, thusawitu MNF treasurer K Vanlalauva chuan central sorkar hmalak dan a zirin revolutionary party inralrin a ṭul thu a sawi.

MNF Treasurer chuan, an party chu revolutionary party an nih thu sawiin, "Central sorkar hmalak dan a zirin he revolutionary party hi a inralrin a ṭul ang. Party chhung wing hrangah pawh national tih kan telh vek a ni. India in ama thua min rinlut dodal ngam party kan ni. Political party pariatin an party nuaiboin min zawm tawh," a ti.

Hnam movement kalpui a nih laiin, ram leh hnam tan a nih avangin an phunnawi ngai lo tih sawiin K Vanlalauva chuan, "Amaherawhchu, kohhran hoten, in thiltih hi ṭha lo kan ti lo, in dosakate hian kan tlin tawh lo e' an tih avangin inremna lam kan hawi ta a ni," a ti a, Calcutta convention-ah India sorkar nen inremna lam hawiin an inbiak thu a sawi.

MNF Treasurer chuan, Laldenga'n 'kan hnam martarte thisen avangin Mizote hi khawvel hriatah kan awm dawn ta' a ti hial tih sawiin, "Remna leh muanna kawng kan zawhna hautakzia leh kawng thuizia kha ṭhangtharte'n an ngaihtuah lêt a ṭul hle a ni," a ti.

ZPM chungchang sawiin K Vanlalauva chuan, "Campaign laia mipui hmaa kan intiamna kha mipuite'n hre reng se, mipui court-in lo ente'ng u," a ti a, MNF sorkarin sikul ṭhahnem tak a dahngheh kha an dinhmun ngaia dahlet an nih chuan, mipuiin thiam loh an chantir ngei tur thu a sawi.

Sorkar thar hi a pawnga puia bei loin, mipuiin lo en zel se a duhthu sawiin MNF Treasurer chuan, "Mipui court-ah thiam an chan leh chan loh a lo lang mai dawn a ni," a ti a, an party mite chu beidawng mai lo turin a fuih.