CM leh a thawhpui hmalakna chinah mipui kan lawm - ZPM President

ZPM chuan nimin khan an pisa-ah chhung inkhawm an hmang a, thusawitu ZPM president Lalliansawta chuan, "Ram hruaitu tura kan thlanchhuah Chief Minister leh minister rualte hmalakna kan hmuh chinah mipui kan lawm. Mipuite beisei tihlawhtling tur pawhin an rintlak dawn hle tih hi ram mipui tam ber hmuh dan a ni," a ti.

ZPM President chuan party-ah inthlanna felfai tak an neih zawh thu sawiin, "President ni leh tura min thlang hi ka lawm takzet a ni. Inthlang ram kan nih angin nihna hrang hrangte kan han inchuh ve nak nak a, duh thuhmun leh tum thuhmun kan nih miau avangin party chhungah harsatna a awm zui lo," a ti a, mi 5,000 dawn pungkhawmah engmah buaina leh harsatna tawk loa an felfai thlup chu nuam a tih takzet thu a sawi.

Sorkar chu party-in a siam a nih thu sawiin Lalliansawta chuan, "Party-in kalphung leh tum a nei a, chu kan duhna tipuitling tur chuan sorkar a lo piang ta a ni. Party leh sorkar hi a kal hrang thei loa, party mipuite duhdan tih­hlawhtlin hi a pawimawh rualin ram mipuite ṭhatna tur tihpuitlin hi a pawimawh ber zawk chu a ni,” a ti.

India sorkarin Lalduhoma hi an ringtawk tih a chiang tawh tih sawiin Lalliansawta chuan, "Kan minister rualte hmalak tum dan pawh an thlawp tih a lang. Kan party thupui 'Ram rorelnaa Pathian ram tundin' tih pawh hi CM kaihhruaina hnuaiah hian a hlawhtlin ngei ka ring tlat," a ti a, ram mipui beisei pawh a hlawhtlinna hmuh chhoh a nih mek thu a sawi.