Covid-19 dona hmatáwnga thawk tur sorkarin mi 1,151 a mamawh belh
Health & Family Welfare minister Dr R Lalthangliana hoin nimin khan Secretariat conference hall-ah Coordination Meeting neih a ni a; Covid-19 donaa a hmatáwnga thawk (frontline worker) tur mamawh belh zat chhût chhuah chu mi 1,151 an nih thu tarlan a ni.
Health Minister chuan, Ministry of Health & Family Welfare-in an chhût danin, kumin December thla tìr lamah chuan Mizoramah Covid-19 vei mi 5,000 an chuang tawh tura ngaih a nih thu a sawi a, "Hetiang dinhmuna kan awm avang hian lo inruahman lâwk a ṭul hle. Contingency Plan-te siam a ṭul a, nasa takin ngaihtuahna sên mek a ni," a ti.
Meeting-ah hian, Covid-19 frontline medical worker, a bikin sample latute leh Covid-19 vei enkawlna hmun Covid Care Centre (CCC) leh Dedicated Covid Health Centre (DCHC)-a thawk awmna tur leh Vairengtea CCC leh Covid-19 frontline medical worker-te awmna tur ruahman a ṭul thu sawi a ni. Aizawl tih loh district 10-a dah tur Truelab Quattro Real Time Quantitative Micro PCR Machine chu district tinah a thlen vek tawh thu te, August thla ral hma ngeia hman ṭan theih tura bun vek beisei a nih thute leh, a enkawltu tur doctor leh technician-te pawh training pek vek an ni tawh thu meeting-ah hian an tarlang.
Hma lam hun thlirin, CCC tam zawk mamawh belh a ni dawna hriat a ni a, district tina thuneitute'n CCC neih belh dan tur an ngaihtuah a ṭul thu sawi a ni. Sports & Youth Services department-in Ramhlun Sports Complex-a an in pali, mi 100 vel awm theihna tur chu CCC atana hman an phal avangin lawmawm an tih thu an sawi. Meeting-ah hian Covid-19 Medical Operational Team chairman Dr ZR Thiamsanga, MLA, chief secretary Lalnunmawia Chuaungo, Health department hotu te, Indian Medical Association, Mizoram Government Doctors' Association, Non-Government Hospital Association Mizoram aiawhte an tel a ni.
Frontline worker mamawh dan
• CCC-ah doctor (AYUSH) 45, nurse 135, health worker 135, helper 190
• DCHC-ah doctor (AYUSH) 20, nurse 60, driver 10, helper 60
• TrueNAT laboratory-ah doctor 10, technician 20, helper 10, data entry operator 10, driver 10
• Sample collection team-ah technician 36, health assistant 36, driver 36
• Contact tracing team-ah leader 13, assistant 26, data operator 13
• Health sub-centre/clinic-ah health worker 40
• A tlem berah volunteer diploma/graduate chung lam 32 leh non-graduate 20 mamawh belha chhût a ni.
• Heng bakah hian hmun hrang hranga duty tur frontline worker 184 la mamawh anga chhût a ni.