Vawk lakluh/thawn-chhuah khap a ni

Khawzawl district bawrhsap K Lalrohlua chuan Champhai district-a African Swine Fever (ASF) vawk hri leng mek laka Khawzawl district a fihlim theih nan khuahkhirhna thupek a tichhuak a; Khawzawl district-ah India ram pawn aṭang leh district dang aṭanga vawk, vawksa leh vawksa aṭanga thil siam lâkluh leh thawn chhuah khap a nih thu a tarlang.

K Lalrohlua chuan, tualchhung vawk talh turte'n Competent Authority aṭangin vawk hrisel ṭha ngei a ni tih finfiahna an neih a ṭul thu a tarlang a, "Vawk damlo nei reng rengte'n a rang thei ang berin District Vety Hospital-ah emaw, VC-te hnenah emaw report ṭhin tur a ni. Vawk thi chu paih mai loin thûk takah phùm ṭhin tur a ni a, vawk neitute'n vawk damlo an hralh/talh tur a ni lo," a ti a; thupek zawm lote chu IPC Sec. 188 hmang hrem theih an nih thu a tarlang bawk.