Jail-ah Mental Health Camp buatsaih

Champhai District Legal Services Authority (DLSA) chuan nimin khan Champhai District Jail-ah Mental Health Camp an buatsaih a; lung ina tang mek zinga mi 60 in rilru lamah harsatna an nei tih tarlan a ni.

Champhai DLSA secretary V Vanlalhriata chuan, lung-ina tang mek zingah rilru lama harsatna neite’n dan anga enkawlna an dawn theihna atan Mental Health Camp chu buatsaih a nih thu a sawi a, lung-ina tang mekte chu an rilru hriselna endiktute lakah inthlahrung loa an harsatnate thlen turin a chah.

Champhai District Jail superin-tendent Lalthuthlungropuia chuan Mental Health Camp chu ṭangkai taka hmang turin lung-ina tang mekte a chah a; rilru put hmang dik nei a, lung-ina tan nawn leh ngai tawh lo tura an rilru siam thar turin a chah bawk.

Clinical psychologist Vanlalmuani Pachuau tarlan danin, Champhai District Jail-a tang mekte’n zawhna an chhanna aṭangin mi 60-in rilru lamah harsatna an nei. Vanlalmuani chuan rilru hrisel lohna thlen theitu leh a tihreh dan kawng hrang hrangte a sawi nghal a ni.