KHAWTHLIR

MPSC member

Mizoram sorkar chuan Mizoram Public Service Commission (MPSC) member atan PB Lianthangpuii, Mizoram Information Service (MIS) a ruat. PB Lianthangpuii hian thla khatah Rs. 2,04,000 a hlawh dawn.

Mibo thiin hmu

February 17, 2024 aṭanga chin hriat loa bo Lalchhuanmawia (49), Zuangtui Veng, Aizawl chu nimin chhun khan an vengin an zawng a, Muanna Veng thlanmual mawngah thiin an hmu. Lalchhuanmawia ruang hi nimin khan postmortem niin, chumi hnuah vui a ni.

Caregiver training

Social Welfare & Tribal Affairs director Dr Lalhriatzuali Ralte chuan nimin khan RIPANS conference hall, Zemabawkah thla thum chhung awh tur kum upate enkawl dan hrang hrang zirna, 'Short Term Course of Geariatric Caregivers' a hawng. Training-a telte hi thla hnih chhung theory class leh thla khat chhung on the job training neihpui tura ruahman a ni.

State Day lawmna

Mizoram State Day chu vawiin chawhma dar 11 hian Vanapa Hall-ah lawm a ni dawn a; governor Dr Hari Babu Kambhampati chu khuallian a ni dawn a, chief minister Lalduhoma chu khualzahawm a ni ang. State Day lawmnaah hian sorkar hnathawk junior administrative grade chin chung lamte tel vek tura hriattir an ni a, district dangah chuan DC-te kaihhruaiin lawm tur a ni.

DMCM ṭhukhawm

Lawngtlai addl. DC Abraham Beirazi Khithie hoin nimin khan a pisaah Lok Sabha MP inthlan lo awm tur atan District Media Certification & Monitoring Committee an ṭhukhawm a; MLA inthlanna kalpui chhunga hma­laknate thlirlet niin, mawh­phurhna leh hmalak dan turte sawiho a ni.

Sumdawngte'n ngen

Mizoram Business Co-ordination Committee chuan State Day Prayer Committee hnen aṭanga ngenna an dawn angin Mizorama sumdawngte chu State Day 2024 puala ṭawngṭaina neih turah an nau (staff)-te zingah ṭawngṭai duh an awm a nih chuan ṭawngṭai remtih sak turin an ngen bakah, a hmuna tel thei lote pawh an awmna hmun aṭanga lo zawm ve turin an ngen.